The Definitive Guide to Living in the Capital , Cairo , Egypt

مصدر الصور: بوابة الأهرام

في متابعة مستمرة لكل الأخبار والمستجدات للاستعدادت والتجهيزات اللازمة لافتتاح المتحف المصري الكبير، عرفنا إن المتحف استقبل مؤخرًا 331 قطعة أثرية كانت معروضة في المتحف المصري في التحرير.

وبحسب ما تم الإعلان عنه، فالقطع اللي استلمها المتحف في منها 42 قطعة خاصة بالملك توت عنخ آمون ، و27 قطعة من أخشاب مركب الملك خوفو الثانية واللي كانت موجودة أصلًا في معمل الترميم الخاص بيها والقريب من المتحف المصري الكبير.

وبخصوص القطع الأثرية الخاصة بمجموعة الملك توت عنخ آمون، فالمجموعة بتضم مجموعة من الصنادل المصنوعة من الحلفا والنسيج ونبات البردي، بالإضافة لصومعة خشب لحفظ الغلال والحبوب اللي لسه محفوظة من يوم اكتشافها في حالة جيده، ده غير مجموعة من أدوات الأكل وأسهم كان بيستخدمها الملك توت عنخ أمون في رحلات الصيد، وغيرها من القطع.

أما بالنسبة للقطع الخاصة بمركب خوفو الثانية، فهي قطع حجمها كبير، علشان كده تم نقلها ضمن المشروع المصري الياباني المشترك لاستخراج وترميم مركب خوفو الثانية، وبعملية النقل الأخيرة دي، واللي تم فيها نقل 27 قطعة من أخشاب المركب، يوصل إجمالي عدد القطع الأثرية اللي تم نقلها من المركب لمركز ترميم المركب في موقع العمل 892 قطعة خشبية.

بعد استلام القطع الأثرية، بدأ فريق عمل متخصص بتوثيق القطع توثيق ثلاثي الأبعاد وتسجيل كل قطعة وترميمها قبل نقلها، وبكده يبقى فريق العمل في المتحف الكبير نجح لحد دلوقتي في نقل 49.779 قطعة أثرية.