The Definitive Guide to Living in the Capital , Cairo , Egypt

معالم وسياحة

بالصور… رحلة ماتتنسيش لمدينة شلاتين وجبل علبة

ابرق ابو سعفة الدئيب جبل جبل علبة حيوانات رحلة سياحة شجر شلاتين علبة عنكبوت غزال محمية وادي
بالصور… رحلة ماتتنسيش لمدينة شلاتين وجبل علبة
بواسطة
Mohammed Sabry

مدينة شلاتين من الأماكن السياحية المميزة في مصر. وناس كتير بتزورها من باب التغيير والاستمتاع بالجو الجميل هناك. ده غير المزارات السياحية هناك زي جبل علبة. فلو بتفكر في رحلة خلال الفترة الجاية، إحنا هنقولك بالتفصيل إزاي تروح، وتقضي وقت ممتع هناك.

أول حاجة هتركب أتوبيس جنوب الصعيد من القاهرة لمدينة شلاتين. بـ 190 جنيه. تقدر تقضي يوم أو يومين هناك، وتستمتع بالمدينة. وأسعار الفنادق هناك معقولة للإقامة.

بعد كده تشد الرحال لقرية أبو رماد، أول مرحلة علشان توصل لجبل علبة. من هناك بتطلع تصريح طلوع الجبل من مكتب المخابرات. ولازم تكون في القرية قبل الغروب لأن الطرق بتتقفل بالليل.

من هناك بتتفق مع سواق ياخدك لجبل علبة، وهيكون معاك الدليل. مستوى تسلق الجبل متوسط. وفي أماكن قليلة بس صعبة. وهناك هتشوف حاجات كتيرة منها: أشجار الأومبيت – التيتل – عنكبوت الجمل – وأنواع كتيرة من الزواحف.

طب افرض خلصت رحلة الجبل في السريع، أو ماعرفتش تطلع التصريح وماروحتش.. خلصت كده؟ لأ ماخلصتش. في برنامج بديل:

منطقة أبرق

تقدر تروح منطقة أبرق. ودي من أهم المناطق التاريخية على مر العصور. وفيها العديد من الوديان زي: العرقة – عيقات – الجاهلية – أبو سعفة، وغيرهم.

المنطقة دي موجود فيها نقوش جدارية من عصور ما قبل التاريخ، وآثار فرعونية في وادي أبو سعفة. وقلاع رومانية قديمة فوق جبل أبرق والعرقة. وكمان فيها بعض العيون والآبار العذبة في قرية أبرق.

وادي أبو سعفة

ومن ضمن وديان المنطقة زي ما قولنا، وادي أبو سعفة. الوادي ده بيمثل موطن لعدد من الحيوانات البرية زي الغزال، الوبر، والتيتل. وفيه آثار من العصر البطلمي، بتتمثل في بوابة منحوتة في صخور جبال أبو سعفة. اسمها “بوابة الماء”. كمان هتلاقوا هناك واحة النخيل عند سفح جبل أبو سعفة.

منطقة الدئيب

وده عبارة عن مجرى واسع طويل بطول 100 كم. بيمتد من السودان ومعدي الحدود المصرية. بيتميز إن تربته أغلبها طينية رملية ملحية. وفيه أنواع كتير من النباتات زي: العشار – الأدليب – الأكاشيا – شجر الغزال.

كل المعلومات دي وأكتر هتلاقوها بالتفصيل على صفحة المصور أحمد عماد

مقترح