The Definitive Guide to Living in the Capital , Cairo , Egypt

من ساعات، أعلنت جامعة القاهرة، عن الانتهاء من عمليات صيانة وإصلاح برج ساعة جامعة القاهرة، بالشكل اللي يضمن عدم توقفها مرة تانية، وده بعد تطوير الأجزاء الميكانيكية والكهربائية غير الأثرية في الساعة.

وقالت الجامعة إنها أسندت عمليات تطوير الساعة لجهة متخصصة، واللي بدورها قامت بتركيب بطاريات احتياطية تضمن استمرار عمل الساعة حتى في ظل انقطاع التيار الكهربائي.

وكانت الساعة اتعرضت في الفترة الأخيرة لأعطال كتير بسبب مرور حوالي 90 سنة على الأجزاء الميكانيكية والكهربائية اللي كانت بتشتغل بيها.

وبمناسبة عودة ساعة جامعة القاهرة الشهيرة للعمل، تعالوا نتعرف على 5 معلومات مدهشة عن الساعة العظيمة دي.

1 – ساعة جامعة القاهرة الأثرية صممها المهندسين اللي صمموا ساعة بيج بن الشهيرة فى لندن، وتأسست الساعة سنة 1937، وبتعد أقدم وأشهر ساعة على مستوى العالم بعد ساعة بيج بن.

2 – تم تركيب الساعة داخل برج بيصل ارتفاعه لحوالي 42 متر، وبيتم الوصول للساعة الكبرى من خلال سلم بيتكون من 168 درجة وفي نهايته خمسة أجراس، وبتقع الساعة بجوار المبنى الرئيسي لإدارة الجامعة، وهي مُسجلة قيمة أثرية.

3 – كان الهدف من إنشاء الساعة إنها تكون بديل للجرس في الإعلان عن بدء وانتهاء المحاضرات، وبتتواجد ساعة صغيرة مماثلة لها داخل المدرجات الكبيرة.

4 – بتتكون الساعة من 5 أجراس بحركة ميكانيكية بتخليها تدق كل ربع ساعة أربع دقات، وكل نصف ساعة 8 دقات وكل 45 دقيقة 12 دقة، أما الجرس الخامس وهو أكبر الأجراس فبيدق على رأس كل ساعة على حسب التوقيت.

5 – ساعة جامعة القاهرة متصلة بالإذاعة المصرية من سنة 1937، وبتدق عليها نشرات الأخبار في كل وكالات الأنباء المصرية والإذاعة المصرية، بسبب إنها أقدم ساعة بالحجم ده في منطقة الشرق الأوسط.