The Definitive Guide to Living in the Capital , Cairo , Egypt

مصدر الصور: صفحة زوار ومحبي بيت يكن

القاهرة فيها مجموعة من أجمل البيوت التاريخية في العالم، كل بيت منهم بمثابة متحف متكامل بينقلك لفترة تاريخية مختلفة. وبيت يكن مش مجرد بيت تاريخي، ده قصة تستحق أن تروى فعلًا. البيت الأثري عانى من الإهمال لسنين طويلة، وفي السنين الأخيرة اشتراه جزار، وخلاه مخزن للحوم! لكن كل ده اتغير لما قرر شخص مصري بيحب البلد دي بجد يشتريه ويرممه ويحوله لمركز ثقافي مميز بينشر علم وفن وثقافة في القاهرة القديمة، وبيعرف العالم بحكاية مكان جميل في القاهرة.. اسمه الدرب الأحمر.

تعالوا نتعرف على بيت يكن من خلال 7 محطات بيختصروا حكايته المدهشة.

 

1 – بيقع بيت يكن في شارع سوق السلاح بمنطقة الدرب الأحمر، وحاليًا هو واحد من أجمل بيوت المنطقة، بعد ما شهد عملية ترميم شاملة. وكلمة يكن (يجن) أصلها تركي، ومعناها ابن الأخت. كان البيت ملك لابن أخت محمد علي باشا اللي أعطى لأبناء أخته منازل كتير في المنطقة دي، وفي الزمن ده كانت المنطقة دي هي قلب القاهرة.

2 – مع مرور الزمن، اتغيرت ملامح المنطقة، لكن فضل البيت ده في مكانه وملكيته بتنتقل من شخص للتاني، ووصلت ملكيته لجزار لحوم، كان بيتسخدمه كمخزن! بعدها عوامل الزمن والإهمال أثرت في البيت بدرجة كبيرة، لحد ما وصلت ملكية البيت لشخص مصري عظيم، فاهم قيمة التراث، ورجع البيت لسابق عهده ورونقه، وماكتفاش بس بترميمه، لكنه حوله لمركز ثقافي ونقطة إشعاع تنموي في قلب القاهرة القديمة.

3 – المالك اللي بنتكلم عنه واللي تبنى مبادرة إحياء بيت يكن، هو الدكتور علاء الحبشي، رئيس قسم العمارة بجامعة المنوفية واستشاري ترميم وصيانة المباني الأثرية، واللي رمم مباني مختلفة في منطقة الدرب الأحمر اللي فيها بيت يكن.

4 – وعن رحلته مع بيت يكن من بدايتها بيقول “الحبشي” في حوار نشره موقع “إندبندنت عربية”: “بعد تخرجي في جامعة الإسكندرية حصلت على الدكتوراه في تخصص الحفاظ على التراث، وعملت في مشروعات متعددة لترميم الآثار في القاهرة القديمة، وتحديدًا في منطقة الدرب الأحمر الواقع بها البيت، وأثناء عملي كانب يلفت انتباهي البيت ده، اللي كان وقتها مملوك لجزار (بائع لحوم) وبيستخدمه كمكان لبيعها، ولما عرفت إن صاحب البيت عنده رغبة في بيعه، وأن هناك نية من أحد المقاولين لشرائه وهدمه لإنشاء مجموعة عمارات سكنية في مكانه، بدأت الفكرة تراودني بشراء البيت”.

5 – شراء بيت بالحجم والحالة دي، كان محتاج مجهود وإجراءات كثيرة علشان يرجع لسابق عهده، لكن الدكتور علاء الحبشي عمل ده بكل حب، وانتصر على كل التحديات. واتحول البيت من مكان مهمل إلى واحد من البيوت الأثرية العريقة في القاهرة، بعدما عاد إليه رونقه، لدرجة إن أهل المنطقة أصبحوا بيطلقوا عليه القصر.

6 – بيستضيف البيت حاليًا فعاليات ثقافية وتنموية للجمهور العام ولأهالي منطقة الدرب الأحمر بشكل خاص، وأصبح البيت مفتوح للمجتمع واتحول إلى ملتقى فني وثقافي بيعكس تراث الدرب الأحمر.

7 – أغلب الفعاليات اللي بتقام في بيت يكن بتعكس طابع المكان وتاريخه، والحرف التراثية المميزة له على مر الزمن، والعمل على إعادة إحيائها من خلال ورش العمل والمعارض، ومنها فعاليات مهتمة بالحرف التراثية، زي الخيامية والنجارة وغيرها، وورش عمل للكبار والصغار في مجالات فنية وثقافية كتير.

 

عاوز تزور بيت يكن؟

العنوان: 3 زقاق الحمداني، سوق السلاح،، الدرب الأحمر، القاهرة.

الهاتف: 0225124121.