The Definitive Guide to Living in the Capital , Cairo , Egypt

أعلنت إدارة المتحف المصري على لسان “إلهام صلاح” رئيسة قطاع المتاحف المصرية إمبارح الأربعاء، عن إفتتاح معرض أثري هو الأول من نوعه في المتحف المصري، واللي هيبدأ استقبال الزوار فيه من النهارده الخميس و لغاية آخر شهر يناير الحالي.

المعرض اسمه “معرض إعادة اكتشاف الموتى” ، وهيتعرض فيه حوالي 15 جمجمة مختلفة، عمرها حوالي 6 آلاف سنة.

المعرض كمان هيكون فيه ثاني أقدم هيكل عظمي في العالم، وبقاله أكثر من 21 ألف سنة، ده غير إنه هيضم عدد كبير من مومياوات وجثامين وهياكل من العصر الروماني.

المعرض يعتبر في تصنيفه من المعارض التعليمية المفيدة، لإنه وبشكل عملي هيسلط الضوء على أهمية علم الآثار العضوية فى الآثار المصرية القديمة، واللي بتساعد بشكل كبير في معرفة معلومات مهمة عن المواقع الأثرية اللي كان موجود فيها الآثار دي.

ده غير إن المعرض هيناقش أربع موضوعات مختلفة ومتعلقة بعلم الآثار العضوية، زي تقدير السن والجنس وكيفية التعرف عليهم من خلال الجماجم، وكمان اكتشاف الأمراض.

والمهم بقى إن المعرض هيناقش بعض أسرار عملية التحنيط وتقنياته الفريدة والغريبة اللي بنحاول نكتشفها من زمان، وبرغم تقدم العلم دلوقتي، ما اقدرناش نكتشف إلا حاجات بسيطه أوي منها.