The Definitive Guide to Living in the Capital , Cairo , Egypt

خلال 3 شهور من النهارده هنشوف ميدان التحرير بشكل مختلف تمامًا، وده بعد الانتهاء من خطة تطويره اللي شغاله فيها الحكومة المصرية حاليًا، وفي السطور الجاية هنكشف لكم تفاصيل الشكل الجديد لأهم ميدان في مصر.

بحسب تصريحات إعلامية للدكتور خالد العناني، وزير السياحة والآثار، هيتم رفع كفاءة متحف وميدان التحرير بالكامل، وخلال 3 شهور من النهارده هيكون ميدان التحرير شكل تاني، أو زي ما قال “العناني” بالنص: “الناس مش هتعرف الميدان بعد التطوير من جماله”.

وأكد “العناني” أن متحف التحرير شهد تغيير دهان الواجهة الخارجية من أول وجديد، بالإضافة لتغيير الإضاءة بالكامل داخل وخارج المتحف والسور الخارجي، وحاليًا تم نصب الثقالات على أول عمارة سكنية في ميدان التحرير، وجاري استكمال باقي العمارات لدهانها وإضاءتها بلون واحد بالكامل.

وأضاف “العناني” أن الكل هيشوف ميدان التحرير مضاء بلون واحد في المساء، عن طريق توحيد الإضاءة، وهتكون إضاءة متحف التحرير هي نفس إضاءة العمارات، وهي نفس نوع إضاءة المتحف والكباش والمسلة، وهي نفس نوع إضاءة مجمع التحرير، مع إزالة كل اللوحات الإعلانية من الميدان بالكامل.

واللي شغال على مشروع إنارة المتحف المصري وميدان التحرير هي شركة مصر للصوت والضوء والتنمية السياحية، وده ضمن خطة تطويره اللي بيتعاون في تنفيذها عدد من الجهات الحكومية واللي بتشمل إضاءة المتحف والحديقة المتحفية والواجهات الخارجية.

وبالإضافة للإضاءة، هتتضمن أعمال التطوير، تزيين الميدان بمسلة الملك رمسيس الثاني، إضافة لأعمال الرصف، وتنسيق الموقع العام، وتم تقسيم العمل في الميدان لـ 6 مناطق هى “صينية الميدان وعمر مكرم والمتحف والمجمع ووزارة الخارجية القديمة وجراج التحرير”.

التطوير هيشمل كمان إزالة ساري العلم الضخم اللي كان موجود في قلب الميدان، وهيتم عمل أنظمة إضاءة أرضية وأحواض فيها شجيرات زيتون وتركيب أجهزة إضاءة بها لإضفاء شكل جمالى ينسجم مع الطابع الفرعوني وأعمال التطوير بالميدان.

والتحرير هو أشهر الميادين في مصر وأكبرها، وهدف الحكومة المصرية من تطويره هو أنه يكون في أبهى صورة علشان يكون مزار ضمن المزارات الأثرية والسياحية.