The Definitive Guide to Living in the Capital , Cairo , Egypt

معالم وسياحة

“صاحبها مات من الحزن”.. قهوة “الفيشاوي” تاريخ وأسرار غريبة

الحسين الفيشاوي خان الخليلي قهوة نجيب محفوظ
“صاحبها مات من الحزن”.. قهوة “الفيشاوي” تاريخ وأسرار غريبة
بواسطة
Mohamed Talaat

قهوة الفيشاوي من أهم قهاوي القاهرة، ورمز من رموز الحسين، كان بيقعد فيها كبار الكتاب والمغنيين والمفكرين والسياسيين، ولسه لحد دلوقتي لها رونقها الخاص، ومهما ظهرت قهاوي جنبها أو في أي حتة، هتفضل سير وسمعة وشهرة “الفيشاوي” مستمرة وغير الكل.

اللي أسس القهوة كان الحاج فهمي الفيشاوي، وهو الله يرحمه توفى حزنًا عليها، بعد ما الحكومة هدمت جزء كبير منها علشان تطوير منطقة خان الخليلي، وبقت مساحتها 150 متر بس بعد ما كانت 400 متر، والراجل مستحملش ومات بقهرته بس بعد ما عمل تاريخ عظيم بدء بترابيزة خشب من 200 سنة، بيتعمل عليها المشاريب لزوار خان الخليلي والمحلات، والترابيزة بقى لها كراسي، والكراسي اشترى ليها طقاطيق للطلبات، وبعد فترة نجح إنه يشتري محل واتنين، وبقت أخيرًا “الفيشاوي” اللي كلنا عرفناها، وهي مكونة من 3 أجزاء، وديكوراتها كأنك قاعد في بيت قديم من عصر الأتراك أو المماليك.

كانت القهوة زي البيت، والمحلات بقت أوض، وكل أوضة لها حكاية، الأولى اسمها أوضة الباسفور ودي مبطنة بخشب مطعم بالأبنوس وفيها أدوات من الفضة والكريستال والصيني، وكانت معمولة مخصوص للملك فاروق وضيوفه، والغرفة الثانية هي “التحفة”، ودي كان عم فهمي الفيشاوي عاوزها تكون تحفة فنية، فزينها بالصدف والخشب المزركش والعاج والأرابيسك، والكنب اللي فيها مبطن باللون الأخضر، وروادها كانوا من الفنانين.

اما بقى الأوضة الثالثة فهي “القافية” ودي عبارة عن لعبة ساخرة، بيلجأوا ليها المصريين أيام راحة البال علشان يعرفوا مين خفيف الدم أكثر من التاني، واللي عنده سرعة بديهة وطلاقة لسان وكانت بتتلعب كل خميس من شهر رمضان، بس للأسف ممنوع دخولها حاليًا علشان فيها مجموعة من الكنوز الأثرية زي “مرأة – ساعة حائط – راديو أثري – نجفة منذ عام 1800″، والأوضة دي كان بيقعد فيها نجيب محفوظ وعبد الحليم حافظ واتفتحت في الألفية الجديدة بس لعمرو موسى وأحمد زويل.

وطبعًا طالما ذكرنا الفيشاوي لازم نقول أن الكاتب والروائي الكبير نجيب محفوظ كان مرتبط بيها جدًا، واشتهرت بيه واشتهر بوجوده عليها، وكتب عليها ثلاثيته “بين القصرين، قصر الشوق، السكرية”.

ونصيحة من كايرو 360 أن أفضل وقت علشان تستمتع بشرب براد الشاي اللي اشتهرت بيه قهوة الفيشاوي، هو وقت الفجر لأن فترة الليل بتكون زحمة جدًا وممكن متلقاش مكان.

مقترح