Mohamed Talaat
الصورة الرئيسية تعبيرية وهي من كتاب الموتى المصري
مصر مليانة اكتشافات مبهرة، والفترة دي في نشاط بحثي مهم بيحصل في مصر ماحدش يقدر ينكره، وأحدث الاكتشافات دي بيثبت كالعادة إن مصر هي أصل التاريخ، تعالوا نعرف تفاصيل الاكتشاف ده في السطور الجاية.
مؤخرًا اكتشف مجموعة من الباحثين خريطة قديمة بتعتبر أول كتاب مصور في التاريخ في مصر، والكتاب ده اعتبره الخبراء دليل بيشرح الطريق إلى عالم “أوزوريس”، إله الموت.
الاكتشاف المهم ده تم في قرية دير البرشا التابعة لمحافظة المنيا في صعيد مصر.
وبيوصل عمر الكتاب إلى 4000 سنة، وبيعتبر هو الأقدم على مر الإكتشافات السابقة الخاصة بالكتب، والكتاب لقوا معاه قطع أثرية داخل المقبرة، وبيعتقد إنها للفرعون منتوحتب الثاني، اللي تولى عرش مصر لحد سنة 2010 قبل الميلاد.
وبتتضمن صور الكتاب مجموعة من البوابات مع خطين للربط بيشيروا إلى طريقين للحياة الآخرى اللي كان بيؤمن بيها قدماء المصريين، وعلى الرغم من أن المقبرة مدمرة إلا أن الكشف أسفر كمان عن العثور على لوحات من الأرز المميزة بالهيروغليفية والصور.
والخبراء اتمكنوا من معرفة تفاصيل الكتابة بإستخدام التكنولوجيا الحديثة واستخدام برنامج عالي الدقة، مع التركيز على الخدوش اللي فضلت موجودة في الكتاب لحد النهارده.