عنوان بلدنا: جولة جديدة يوم الجمعة في القاهرة الفاطمية
Cairo 360
منطقة الأزهر والحسين ومحيطهم بقوا بالنسبة لكتير مننا من الأماكن المستهلكة، لكن مع أول زيارة برفقة حد فاهم هنعرف أننا لسه ماكتشفناش أي شيء عن المنطقة، وأن أسرارها أكتر من أننا نستوعبها في زياراتنا العابرة!
“عنوان بلدنا” هي مبادرة شبابية بدأت من تلات سنين تقريبًا، بدأت بهدف ثابت ومستمر وهو: تنشيط السياحة الداخلية، وزيادة الوعي الأثري والتاريخي لدى المصريين عن بلدهم.
بعد غيبة طويلة نسبيًا على جمهورها بتعود المبادرة لإطلاق رحلة جديدة مع جولة أخرى داخل أحد الأماكن الأثرية في القاهرة، والمرة دي تم اختيار منطقة الأزهر لإعادة الاستكشاف بعيون خبيرة.
الجولة اللي مقرر إقامتها يوم الجمعة الجاية (9 ديسمبر) هتبدأ من أمام قبة الغوري في تمام التاسعة صباحًا، وهتمر في اتجاه باب زويلة وهتاخد في طريقها سبيل الست نفية البيضا والنفق الحسيني وجامع المؤيد شيخ وسجن الشمايل وسبيل محمد علي ومجموعة الغوري والجامع الأزهر وغيرهم، وهتنتهي في بيت زينب خاتون في تمام الخامسة مساءً.
اللي مخلي جولة زي دي مختلفة هو كونها بتتعمل بصحبة مرشدين سياحيين على دراية بالأبعاد التاريخية والثقافية لكل المزارات اللي هناك، وده هيرفع من قيمتها المعرفية وهيخليها إضافة حقيقية لكل المشاركين، اللي لما يزوروا الأماكن دي بعد كده أكيد هيشوفوها بعيون مختلفة.
الجولة مجانية تمامًا، المشاركين بس هيدفعوا تذاكر الدخول للأماكن الأثرية اللي بتشترط الدخول بتذاكر، وده هيكون في أثناء الجولة على شباك كل مكان.
الحجز بيتم عن طريق إرسال رسالة على صفحة المبادرة على فيسبوك (من هنا)، وهيتم التأكيد على المشاركين بأسمائهم، والعدد هيكون محدود علشان يبقى التحرك سهل ويقدروا يغطوا الموجودين بعدد كافي من المرشدين والمنظمين من غير ما تحصل مشاكل.
أي تفاصيل زيادة تقدروا تعرفوها من الفعالية الإلكترونية للجولة على فيسبوك من هنا.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
