The Definitive Guide to Living in the Capital , Cairo , Egypt

تصوير: حسن أبو شعر وياسر محمود

مصر فيها أماكن تاريخية عظيمة، دي حقيقة ماحدش يقدر ينكرها، ومن الأماكن دي، شارع المعز لدين الله الفاطمي، واللي بنحتفل الأيام دي بالذكرى الـ 12 على إعادة افتتاحه، وهو الشارع اللي تم تطويره في فبراير من سنة 2008 علشان يكون أكبر متحف مفتوح للعمارة والآثار الإسلامية في العالم، تعالوا نتعرف أكتر على شارع المعز.

بيرجع تاريخ شارع المعز لأكثر من ألف سنة، وتم تشييده خلال عهد الدولة الفاطمية في مصر، وكان إسمه في البدابة  الشارع الأعظم، وبعدها أصبح إسمه قصبة القاهرة، وأخيراً أطلق عليه اسم المعز لدين الله في سنة 1937 تكريمًا لمنشئ القاهرة، المعز لدين الله الفاطمي.

بيمتد شارع المعز من باب الفتوح إلى باب زويلة، وبيشمل شوارع باب الفتوح، أمير الجيوش، النحاسين، بين القصرين، الصاغة، الأشرفية، الشوايين، العقادين، المناخلية، والمنجدين، والسكرية ولحد باب زويلة.

الشارع بيضم كتير من الآثار الإسلامية المهمة، زي جامع الحاكم بأمر الله، وكالة قايتباي، بيت السحيمي، مسجد سليمان أغا السلحدار، جامع الأقمر، وسبيل كتاب عبد الرحمن كتخدا، قصر الأمير بشتاك اللي بيعتبر أقدم قصر مملوكي احتفظ ببقاياه في مصر، قبة السلطان قلاوون، مدرسة ومسجد الظاهر برقوق، مدرسة المنصور قلاوون، مقبرة الملك الصالح نجم الدين أيوب، المدرسة الصالحية، المدرسة الكاملية، مدرسة الظاهر برقوق، مدرسة الناصر محمد بن قلاوون، جامع المظهر، مسجد الغوري، مدرسة وسبيل وكتاب الغور، وأماكن مهمة تانية كتير.

والشارع ده بيعتبر جزء من القاهرة التاريخية، اللي تم تسجيلها على قائمة التراث العالمي في سنة 1979.

والوصول لشارع المعز من أسهل ما يمكن، هتركبوا مترو الأنفاق لحد محطة العتبة، ومن هناك هتلاقوا عربيات الحسين، اللي هتنزلكم أمام الشارع على طول.