The Definitive Guide to Living in the Capital , Cairo , Egypt

لما هتدخل متحف أحمد شوقي في شارع النيل لأول مرة، هتحس إنك بتسمع شعر! متحف “أمير الشعراء” هيعجبك جدًا لو كنت محب للفن والأدب والشعر. تعالوا نتعرف أكثر على تفاصيل المتحف وحكايته التاريخية.

متحف أحمد شوقي موجود في شارع النيل بالجيزة، وهو كان فيلا بناها بنفسه بعد عودته من المنفى وكان اسمها “كرمة بن هانئ”، بنيت على التراث المعماري الأندلسي وكانت بتحاوطها الأشجار والزهور في كل الجوانب، واتحول بقرار جمهوري من الرئيس السادات لمتحف وتم افتتاحه عام 1977، وبعد اهمال فترة كبيرة تم تجديده وإعادة افتتاحه سنة 1996 واتعمل فيه مركز ثقافي باسم “كرمة بن هانئ”.

المتحف مساحته 1433 متر، وفيه تمثال من البرونز لأمير الشعراء بيتوسط حديقة المتحف، وبيتكون من 11 غرفة على دورين، وبيطل على كورنيش النيل، وجواه مجموعة من 1153 قطعة من المقتنيات ما بين أثاث ولوحات وتحف وصور فوتوغرافية ونياشين وملابس تشريفية وهدايا ووثائق.

الدور الأرضي من الفيلا بيتكون من مكتبة أمير الشعراء وفيها آلاف الكتب النادرة في مختلف الفروع والمجالات، وكمات مسودات القصائد والمسرحيات الشعرية اللي من تأليفه، ومخطوطات الأغاني اللي غناها محمد عبد الوهاب، وكمان فيه غرفة التدخين وغرفة الطعام اللي اتحولت لمكتبة لزوار المتحف، ده غير غرفة المكتبة السمعية اللي بتضم بعض الألحان والأغاني القديمة.

ومن ضمن مقتنيات الدور الأرضي صالون مذهب داخل غرفة الاستقبال، والجدران والسقف تصميمهم على الطراز المعماري الإسلامي، وفيه نقوش مزخرفة وآيات قرآنية بالخط الكوفي على الحوائط، وفيه سلم داخلي خشب مكسي بالرخام الأخضر وعليه سجادة حمراء وده بيودي للدور الثاني.

أما الدور الثاني موجود فيه غرفة النوم واللي محتفظة بشكلها ورونقها بجدرانها اللي بتغطيها أوراق الحائط، وسرير نحاس مع ناموسية على إطار علوي، وكمان موجود في نفس الطابق غرفة نوم زوجته خديجة شاهين، وغرفة مكتبه اللي فيها أثاث فاخر على الطابع الفرنسي،  وجنبها غرفة متخصصة بالأوسمة والنياشين وشهادات التكريم، وكمان فاترينة مخصصة لبدلة التشريفة اللي كان بيلبسها أحمد شوقي في المناسبات المميزة.

وبيضم الدور الثاني كمان غرفة فيها المخطوطات المهمة الخاصة بأمير الشعراء ومجموعة من اللوحات التشكيلية والتحف النادرة، وكمان غرف الأولاد.

تقدروا تزوروا المتحف الموجود في 6 شارع أحمد شوقي – متفرع من شارع مراد – الجيزة، ولكن البوابة على شارع النيل.