Omar Abd-elmaqsoud
في أواخر سنة 2016 تم إعادة افتتاح واحد من أهم متاحف الصعيد بعد سنوات من تعرضه للسرقة، ومن يومها بقى “متحف ملوي” في محافظة المنيا ليه شعبية كبيرة جدًا.
وكنوع من التفاعل مع الجمهور، إدارة المتحف طلبت من الجمهور ورواد المتحف إنهم يختاروا من بين ثلاث قطع أثرية “قطعة المتحف لشهر فبراير”عوده عن طريق تصويت على الصفحة الرسمية للمتحف على الفيسبوك.
القطع الثلاثة كانت تابوت من الألباستر لـ”جحوتي عنخ” والقطعة التانية كانت تابوت من الخشب الملون والمزين بأجزاء من كتاب الموتى، أما ثالث قطعة فكانت من الخشب المزخرف ببعض النصوص الجنائزية، وكانت نتيجة التصويت لصالح تابوت “جحوتي عنخ”.
المتحف بيضم مجموعات متنوعة من القطع الأثرية اللي بيرجع تاريخها لعصور مختلفة وحضارات متنوعة زي الحضارة المصرية القديمة، والرومانية – اليونانية والقبطية والإسلامية.
مديرة المتحف “جيهان نسيم” واحدة من اللي ساهموا في شهرة المتحف والمحافظة عليه، وفي حوار ليها مع وكالة الأنباء الصينية “شينخوا” قالت إن إعادة افتتاح المتحف كانت رسالة سلام للعالم كله، وإن مصر قادرة تحافظ على تراثها، وأكدت إن شعبية المتحف بتزيد سنة ورا سنة سواء في أوساط الزوار المحليين أو الأجانب.
المتحف زي ما قالت “جيهان نسيم” بيضم في الوقت الحالي 950 قطعة أثرية، وكان فيه حوالي 1089 قطعة قبل ما يتعرض للنهب، وبعضها تم تدميره، وبعضها فُقد وبعضها أعُيد ترميمه وعرضه في المتحف مرة تانية، أو بمعنى أدق تم استرجاع ما لا يقل عن 80% من القطع الأثرية اللي اتسرقت من المتحف في 2013، وحوالي نصفها كان محتاج ترميم.
من بين القطع النادرة الموجودة في المتحف تمثال لبنت الملك “أخناتون” بيرجع لعصر الدولة الفرعونية القديمة، وتمثالين لـ “عنخ بيبى” ومراته بيرجع لعصر الدولة الفرعونية الحديثة، يعني من حوالي 4500 سنة.
لو حابين تتعرفوا أكتر على متحف ملوي، ممكن تزوروا صفحته الرسمية على الفيسبوك من هنا.
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
