The Definitive Guide to Living in the Capital , Cairo , Egypt

العاصمة المصرية مليانة أماكن علمية مهمة، يمكن المشكلة إن مش كلها واخدة حقها إعلاميًا، ودورنا دائمًا في كايرو 360 ندور على أجمل الأماكن الممتعة الموجودة في القاهرة، علشان نعرفكم عليها عن قرب، ومن الأماكن الجميلة اللي تستحق الزيارة في مدينتنا الصاخبة، مرصد القطامية الفلكي الكبير، واللي بيحتوي على التليسكوب الأكبر في الوطن العربي والشرق الأوسط وشمال أفريقيا.

تعالوا نتعرف أكتر على المكان المهم ده، واللي مش كتير من المصريين يعرفوا إن من أهم إنجازاته هو مشاركته في الأرصاد الدقيقة اللي اتاخدت لسطح القمر لاختيار مواقع هبوط الإنسان على القمر في أواخر الستينيات.

مرصد القطامية الفلكي الكبير بيقع على مسافة 80 كم تقريبًا من وسط العاصمة المصرية في إتجاه مدينة السويس (طريق العين السخنة)، وهو موجود بالتحديد فوق جبل ارتفاعه 480 م عن مستوى البحر، والمرصد تابع للمعهد القومي للبحوث الفلكية والجيوفيزيقية بحلوان.

بيرجع تاريخ إنشاء المرصد ده لسنة 1964، وهو امتداد لمرصد حلوان اللي أنشئ سنة 1903 واللي بيعتبر من أقدم المعاهد البحثية في مصر والشرق الأوسط.

أول ما هتدخل مبنى المرصد، هتحس إنك فعلًا في مدينة علمية مصغرة، وأول حاجة هتلاحظها في المكان هو مبنى المنظار وده بسبب إنه بيتميز بوجود قبة كبيرة مميزة فوقه، والمبنى ده فيه تليسكوب مدهش وضخم جدًا، بيزيد وزنه عن 50 طن وطوله أنبوبته بيزيد عن 9 أمتار، وقطر مرآته 74 بوصة يعني حوالي 188 سم.

مرصد القطامية الفلكي الكبير فيه كمان تليسكوب تاني صغير بحجم 14 بوصة.

المرصد بيستقبل عشاق الفلك من كل الأعمار، وبيستقبل بشكل مستمر كمان طلاب قسم الجغرافيا في كليات الآداب بالجامعات المصرية، واللي هناك بيتعرفوا بشكل عملي على خريطة السماء وحركة المجرات والنجوم والكواكب.

المرصد بيوفر لكم تجربة مثيرة هتعرفكم على كيفية استخدام الكاميرات لتحديد خط الأفق للسماء لرصد حركة القمر، ورسم تضاريس سطح القمر، ومعرفة طريقة تحديد الاتجاهات الأصلية بالليل، والاهتداء بمجموعة النجوم السبعة للدب الشمالي، وكمان رصد حركة مجرة أندروميدا وهي المجرة الأقرب من مجرة درب التبانة.

وهتلاقوا في المكان عدد من الاستراحات المجهزة لراحة الراصدين ، ومحطة لتوليد الطاقة الكهربائية (ماكينات ديزل بتشتغل بالسولار) لتشغيل الأجهزة والمعدات والمواتير الكهربائية الضخمة اللازمة لشغل المرصد.

وبسبب موقعه المميز على أطراف القاهرة، عدد الليالي الصافية للسماء في المرصد بتوصل لحوالي 250 ليلة على مدار السنة، وده بدوره انعكس على دقة الأرصاد ونقاء الصور المأخوذة من المنظار، والأمر ده جعل له شهرة عالمية بين مراصد العالم كله.

إزاي تزور مرصد القطامية الفلكي الكبير؟

المرصد مفتوح للزيارة، لكن فيه شروط معينة لزيارته، لازم الأول تروح مقر قسم الفلك بحلوان لطلب زيارة المرصد، وبتقدم بياناتك كاملة مع صورة بطاقتك القومية، بعد كدة بتاخد تصريح كتابي مختوم من رئيس قسم الفلك لدخول المرصد، وبعد الوصول للمرصد بتقدم صور الرقم القومي للأمن في المكان مع تصريح الزيارة، وبتدفع رسوم الزيارة اللي بتكون حوالي 70 جنيه في حالة الزيارة والمغادرة في نفس اليوم.

أما بقى لو عاوز تبات للصبح علشان تشوف و تستمتع بشروق الشمس السعر بيكون 100 جنيه.

المرصد مش بيقدم وجبات أو عصائر، بس المكان فيه ثلاجة وكاتيل علشان لو حابب تعمل حاجة سخنة وبيسمح باستخدام كاميرات للتصوير، وفيه مشرفين في المكان بيشرحوا لك كل حاجة.

ننصحك يكون معاك جاكيت تقيل علشان الجو بيبقى برد بالليل.