The Definitive Guide to Living in the Capital , Cairo , Egypt

واضح إن 2020 هتكون سنة إنجازات بجد، وواضح كمان إنها هتكون مختلفة ومميزة عن غيرها في مجال السياحة والآثار في مصر، وخاصةً في وجود وزارة زي وزارة الآثار بتاعتنا اللي دايمًا بنشوفها بتمثل مصر في أي مكان في العالم بشكل مشرف جدًا، ده غير نشاطاتها المختلفة والمتعددة سواء في اكتشافات أو فعاليات عالمية.

مؤخرًا كشفت وزارة الآثار عن خطتها لتسجيل 3 فعاليات مصرية مهمة فى موسوعة جينيس للأرقام القياسية، وده جه بعد أسبوع من تسجيلها لوحة “توت عنخ آمون” المصنوعة من أكواب القهوة.

أول فعالية قدمت الوزارة طلب بيها للموسوعة علشان تتسجل هي احتفالية افتتاح المتحف المصري الكبير، واللى هتكون فعليًا أكبر فعالية فى التاريخ، وده لإن مكانها هيكون بطول 2 كيلومتر، وعرض 600 متر، يعني المسافة من المتحف المصرى الكبير لحد الهرم، ده غير إن الهرم هيكون جزء من الاحتفالية، وهيشارك في الاحتفالية دي كل أجهزة الدولة ووزاراتها.

الإعلان عن تلقى طلبات الشركات الدولية لتنظيم الاحتفالية هيكون في نص الشهر الحالي “يناير”، وهيتم الإعلان عن الشركة الفائزة بالتنظيم خلال فبراير.

الحدث التاني من الأحداث اللي هتقدم الوزارة طلب بتسجيلها في موسوعة جينيس هي فعالية هنشوفها كلنا في احتفالية افتتاح المتحف المصري الكبير، وهي نقل أكبر أثر عضوي فى التاريخ ولسه موجود لحد النهارده وهو “مركب خوفو” اللي عمره حوالي 4600 سنة، وطوله 43 متر.

الحدث الثالث هيكون الكشف عن أول مسلة معلقة فى العالم، واللي هتدي فرصة لزوار المتحف لأول مرة إنهم يشوفوا خرطوشة الملك “رمسيس” الموجودة تحت المسلة، وبشكل عملي تم الانتهاء من 85% من الأعمال الإنشائية لقاعدة المسلة والمنطقة المحيطة بها، تمهيداً لنقلها.