The Definitive Guide to Living in the Capital , Cairo , Egypt

أيًا كان تقييمك لوضع مصر كدولة على خريطة العالم، ما تقدرش تنكر أن أم الدنيا دي عليها حلاوة غريبة ما لهاش زي؛ فكر فيها كده لو كانت مصر دي واحدة ست كان شكلها هـيبقى عامل زي… جميلة جمال غير معتاد، شخصيتها مركبة وعندها ربع طاير، وغير متوقعة… ومع كل ده ما تعرفش تعيش من غيرها -حاجة كده تمشي على تيمة أغنية قديمة لعمرو دياب اسمها أحبك أكرهك. ما علينا، الفكرة كلها أننا بـنتأخد في زحمة ودوشة القاهرة اللي بـتنسينا أن مصر فيه أماكن يتعاش فيها غير القاهرة. الحمد الله عندنا خمسة مصورين على الإنستاجرام بـيفكرونا أن مصر فيها جمال، وصورهم بـتحمسنا أننا نركب أول أوتوبيس رحلات نشوفه أيًا كانت وجهته إيه.

1 – نور الرفاعي:

كمصور وثائقي نور مختلف عن أي مصور ثاني؛ لأنه بـيشوف الجمال في أغرب الأماكن. صوره الموجودة على الإنستاجرام مبهرة ومختلفة، وخصوصًا أنه بـيروح الأماكن اللي ما عليهاش رجل كثير، زي مثلًا منطقة جبل علبة النائية واللي مش سهل تتراح وتعتبر حلم أي مغامر.

 2- نهى زايد:

مؤسسة ماركة Zafir T-shirts، وواحدة من مؤسسي @ArabicTypography  على الإنستاجرام، نهي زايد بـتقوم برحلات عائلية في كل حتة في مصر؛ من الصحاري  للجبال وحتى السواحل وبتصور مجموعة بورتريهات مميزة، ده غير التجمعات الصوفية والتكوينات المعمارية والفنية اللي بـتظهر جمال مصر الغريب… كل ده وإحنا متابعين وبـنقول يا ريت رحلاتنا العائلية زي رحلاتها.

3- مصطفى شرارة:

سبع صنايع والبخت مش ضايع… ده الوصف اللي ممكن نطلقه على مصطفى شرارة اللي ما فيش حاجة ما بـيعرفش يعملها. كـ Video Producer، مصطفى كان واحد من الأشخاص اللي وراء حملة #ThisisEgypt  . بس من قبل الحملة دي وكل محبي السفر ومتابعي الإنستاجرام عارفين أن شغل مصطفى مبهر، وعشقه الواضح للمغامرة واختياره للأماكن المختلفة بـيحمس أي حد  أنه يحضر شنطته ويسافر لوحده ويعيش مع نفسه.

4- تيمور عثمان:

عضو آخر من أعضاء حملة #ThisisEgypt ، تيمور عثمان من أوائل الناس اللي اشتغلت على حملات مماثلة، زي حملته اللي عملها على الإنستاجرام من سنتين بهاشتاج #roamegypt ، علشان يبقى ملهم لناس كثير أنهم ينتشروا في أنحاء المحروسة ويشاركوا بصورهم. صوره اللي دائمًا بتظهر روحه الإيجابية بتضم رحلات في الصحاري وتحت المياه كمان، ده غير كوبايات الشاي اللي بـيشربها مع أهالي المنطقة اللي هو فيها.

5- عويس أبو زيد:

الرحالة اللي تقريبًا عنده توقيت زمني ومكاني غير اللي عندنا خالص؛ المصور الحر عنده قدرة أنه يكون دلوقتي في بورسعيد وكمان شوية تلاقيه في القاهرة… أو نيجيريا – لو ما كانتش صوره من نوعية السهل الممتنع، كنا قلنا أن عويس عنده قدرات خارقة، أو باب زمني ممكن تحاول الحكومة السطو عليه. ما علينا، عويس ميزته اللعب بالظل والنور وده اللي بـيخلي فيه نوع من الغموض ما تلاقيهوش في صور أي حد ثاني.