The Definitive Guide to Living in the Capital , Cairo , Egypt

فيلم Criminal من إخراج إريل فرومين وبطولة كيفن كوستنر وجاري أولدمان ورايان رينولدز وغيرهم من الفنانين، بنشوف قصة عميل للسي آي إيه، بينطلق في مهمة للبحث عن مجرم دولي غامض، قبل ما يتسبب في اندلاع حرب عالمية جديدة، لكن العميل بيتعرض للقتل، وبتصبح المهمة الوحيدة للسي آي إيه علشان يقدروا يكملوا المهمة، هي القيام بعملية زرع ذكريات العميل المتوفى في جسد مجرم خطير (كيفن كوستنر) علشان يقدروا يمنعوا العالم من الوقوع في كارثة.

الفيلم بينتمي لأفلام الحركة والذكاء والإثارة، بمعنى إننا مش بننتقل من مشهد حركة للتاني بدون تمهيد، بل على العكس الأكشن في الفيلم كان مبرر، وله أسباب قوية ومنطقية وبيتم التمهيد له من خلال إدارة لعبة في منتهي الذكاء، لكن في النهاية الفيلم مش بيقدم قصة جاسوسية بقدر ما بينتمي أكتر لفئة الأكشن والحركة.

الحركة؟

بما إننا بنتكلم عن الحركة، لازم نتكلم عن إخراج مشاهد الحركة اللي كان أكتر من رائع، وكان من الواضح أن الفيلم مرصود له ميزانية ضخمة لإنتاجه لإننا شوفنا مشاهد مطاردات وانفجارات متميزة ومتعوب عليها ومافيش بخل إنتاجي.

يمكن العيب الوحيد في الفيلم من وجهة نظرنا، الملل اللي كان بيصيبنا أحيانًا في مشاهد الإنتقال بين العمليات أو المطاردات، لكن بشكل إجمالي نقدر نقول أن الفيلم مستواه جيد وقدم خلطة من الخيال والتشويق بحرفية.

Criminal  فيلم أكشن جميل يستحق المشاهدة.. اتفرجوا عليه يا عشاق الأكشن ومنتظرين رأيكم.