The Definitive Guide to Living in the Capital , Cairo , Egypt

من زمان وإحنا ملاحظين سيطرة الأفكار الدينية على كتير من الأعمال السينمائية.. سواء تم ده بشكل مباشر أو غير مباشر، حتى في أفلام الرعب اللى بنشوف فيها تسريب لأفكار دينية أو أخلاقية معينة زي فكرة العلاقات الجنسية خارج إطار الزواج وغيرها من الأفكار اللى بيتم إدانتها أو تشجيعها، على أساس الأسس الدينية والأخلاقية.

 Miracles from Heaven بينتمي للنوعية دي من الأفلام. من إخراج باتريشيا ريجين وبطولة جون لينش وجنيفر جارنر وكوين لاتيفا بنشوف قصة بنت صغيرة بتعاني من مرض نادر، وبيحاول أهلها السعي لتشخيص وعلاج مرضها النادر بدون فايدة، لحد ما بتحصل لها حادثة، بتبدأ بعدها حياتها في التحول بشكل غير تقليدي، ومش عاوزين نحرق الأحداث أكتر من كده علشان تقدروا تشوفوا الفيلم كويس.

الأداء التمثيلي للأبطال كان قوي ومتميز، وبصراحة مهمتهم كانت بسيطة: مجرد إظهار الأحاسيس الأساسية زي الخوف والفزع والحب واللهفة، اما عن أداء كيلي روجرز فكان أفضل من رائع وقدرت توصل لنا شعور الطفلة الصغيرة اللى بتعاني الألم والمرض بدون حل منطقي أو طبيعي.

الموسيقى التصويرية كان لها دور كبير في الأحداث، وقدرت تقرب لنا المشاعر الكتير اللى بتتصارع داخل الشخصيات الرئيسية للأحداث، الموسيقى كانت بتعلى في المشاهد الصعبة وتنخفض من جديد في المشاهد الحوارية علشان تعطينا القدرة على الملاحظة والتدقيق في الأحداث، وبشكل عام الفيلم مش محتاج تركيز أكتر من المعتاد في أحداثه لأن الحبكة مفهمومة ومافيهاش إلتوائات أو مفجئات كبيرة.

الديكورات كمان كان لها أثر كبير على الأحداث، وقدرت تنقل لنا الجو العام للفيلم خصوصًا أجواء المستشفى الكئيبة وحالة الحزن والمرض اللى كانت بتخيم على الفيلم خاصة في النصف الأول منه.

 Miracles from Heaven فيلم ديني بالأساس، ما تشوفوش إلا وأنت حاطط في دماغك، أن الهدف الأساسي من الفيلم توصيل قيم أخلاقية ودينية للمشاهدين.