The Definitive Guide to Living in the Capital , Cairo , Egypt

كثير جدًا من المشاركين في الأعمال العامة والأنشطة الطلابية بـ تبقى ناقصاهم في البداية خبرة الحركة، في حين أنهم بـ يكون عندهم حماسة شديدة وهمة عالية جدًا، فإما أنهم يلاقوا حد يستثمر الحماسة ويوجهها، أو يهبطوا مع الوقت بدون فائدة تذكر.. وبالتالي اللي هـ نحاول نعمله هنا هو تقديم مساعدة جزئية لهم:

بص يا سيدي.. من الحاجات اللي دايمًا بـ تبقى عاملة مشكلة في الإجابة على سؤال "إزاي"؟ في الأنشطة المشابهة هي أنك لو ما عرفتش تعمل اتفاق يخلي المهام بتاعتك تخلص على أيد جهة خارجية، هـ تفضل محتاج أنك تعملها بنفسك، فلازم تبقى عارف إزاي تعمل كده دايمًا علشان أوقات الزنقة ومواسم الزحمة، وإحنا هنا هـ نقسم الحاجات اللي بـ نتعب جدًا في توفيرها لو ما لاقيناش Sponsors نوعيين يوفروها، لأربع أقسام:

1. "اللوجيستيات" بأنواعها.
2. أماكن الاجتماعات.
3. أماكن إقامة الفعاليات المجمعة.
4. تدريبات الأعضاء.

 

أولًا: اللوجيستيات بأنواعها:

1- التي شيرتات:

الأماكن الأشهر في الأوساط دي:

– مصنع "اليسر": جنب مستشفى الخليفة، بالقرب من مسجد السلطان حسن، السيدة عائشة.

– شارع "كلوت بك" في العتبة، وده أشبه بسوق يعني، هـ تلاقي هناك أماكن كثير وأسعار مختلفة، ومتوفر في الشارع كمان مطابع للطباعة على التي شيرتات (أوفسيت).

وعندك اختيار ثالث بأنك تشتغل مع أحد جهات عمل التي شيرتات اللي بـ تخدم نفس أفكار نشاطك.. سواء ينتجوا لك بنفسهم أو يوصلوك بالأماكن اللي بـ يتعاملوا معاها.. تقدر تتعرف على الجهات دي وتتواصل معاها من خلال "دليل كايرو 360 لأماكن بيع تي شيرتات بتصميمات عربي".

 

2- المطبوعات:

وتشمل الـ "ID" والـ "Banners" والـ Flyers وغيرهم.. ويلحق بهم كمان الـ "Pins" والدروع الزجاجية والخشبية اللي بـ تحتاجها في تكريم الأعضاء أو شكر الضيوف في الفعاليات الكبيرة، ودي هـ تلاقي سوقها في مكان من اثنين:

– أرض شريف، وشارع محمد علي في العتبة.

وفي شارع محمد على تحديدًا هـ تلاقي عدد كبير جدًا من الأماكن (كل خطوة تقريبًا) وأسعار متفاوتة إلى حد بعيد.. وإمكانية الفصال عالية.. وبالتالي هـ تحتاج ما تستعجلش وتأخذ وقتك علشان توصل للي أنت عاوزه.

– منطقة بين السرايات:

أمام بوابة تجارة جامعة القاهرة.. هـ تلاقي هناك أماكن كثير برضه.. بس عامل الوقت هنا مهم جدًا.. علشان طلبة الجامعة لكليات العمارة والفنون بـ يبقوا شغالين باستمرار هناك وبالتالي بـ يبقى فيه ضغط شديد على المطابع في وقت الدراسة.

– مطبعة "Art Friend" في الجيزة، أول شارع مراد:

والميزة هناك أنك ممكن تعمل Account باسم نشاطك الطلابي علشان يبقى لك خصومات خاصة بعد كده.. وبـ يشتغلوا على كل أنواع المطبوعات برضه.

 

3- مستلزمات الديكور:

عندك مكان من اثنين:

– حارة اليهود في العتبة وسوق الورق.

– مكتبة كاميرا ٩ آخر شارع المرور، بين السرايات.

الأسعار في حارة اليهود أرخص نسبيًا.. لكن الدنيا هناك زحمة ومتعبة شوية فمحتاجة حد صاحب طاقة وبال.

 

4- الـ "Notebooks" ومستلزمات الـ "Sessions":

بالنسبة للـ "Notebooks" لو مش هـ تطبعها بنفسك في مكان من الأماكن اللي قلنا عليها مع المطبوعات، يبقى ممكن تشتريها جاهزة بكميات من شارع "الفجالة" في رمسيس، الحاجات بـ تتباع هناك بأسعار الجملة.. هي وبقية اللوازم زي الأقلام وخلافه.

 

ثانيًا: أماكن مناسبة للاجتماعات أو الـ Sessions:

هنا ييجي دور الـ Co-Working Spaces، تقدر تعرف عنها وعن أماكنها وكل التفاصيل اللي هـ تحتاجها من خلال "دليل كايرو 360 لمساحات العمل المشتركة في القاهرة".

ثالثًا: قاعات ومسارح الـ Events:

ودي ممكن نقسمها لـ 3 أقسام:

1- أماكن حكومية أثرية، زي مثلًا:

– قصر الأمير طاز أو وكالة الغوري.. ودي أماكن أثرية مناسبة وجوها ساحر جدًا للفعاليات اللي محتاج فيها تبسط الناس وتوفر لهم جو مناسب للاستيعاب.

– درب 17 18 في مصر القديمة، مجمع الأديان.

لكن مشكلة الأماكن اللي من النوع ده أن حجزها بـ يأخذ وقت ومجهود كون الأماكن دي تابعة لأكثر من جهة حكومية: صندوق التنمية الثقافية في الأوبرا، ووزارة الآثار، ووزارة الثقافة، وهـ تحتاج تشتغل على أخذ موافقات من كل الجهات المعنية قبل إقامة أي فعالية هناك.

 

2- أماكن حكومية عامة، زي مثلًا:

– مسرح وزارة الشباب في الزمالك، والتواصل بـ يكون مع وزارة الشباب مباشرة في الزمالك.

– قاعة سيد درويش في شارع خاتم المرسلين، الهرم.

– مسرح الهناجر، دار الأوبرا المصرية.

– مسرح الحضارة، دار الأوبرا المصرية (من أنسب الأماكن وأسهلها في الإجراءات، وسعته حوالي 250 فرد تقريبًا).

– قاعة مركز السموم في القصر العيني (عدد 120 فرد تقريبًا).

– قاعة المؤتمرات بكلية طب القصر العيني.

– قاعة الأزهر للمؤتمرات، مدينة نصر.

– مسرح السعيدية، الجيزة.

 

3- جهات خاصة، زي مثلًا:

– ساقية الصاوى، الزمالك، وده يعتبر مكان مثالي للفعاليات.

– مسرح رسالة، المقطم، وحجزه بـ يكون بالتواصل مع المسؤولين عن الجمعية، فرع المقطم. (سعته حوالي 600 فرد تقريبًا).

– قاعات المؤتمرات في النوادي أو المنشآت الاجتماعية الخاصة.

رابعًا: تدريبات الأعضاء:

عادةً دي مش بـ تمثل مشكلة كبيرة للأنشطة الطلابية اللي بقى لها كذا سنة، لأنهم بـ يكون عندهم أجيال قديمة أصحاب خبرة نوعية في كل مجال وفي الغالب هما اللي بـ يعملوا التدريبات دي للأعضاء الجدد، لكن أحيانًا بـ يحصل عجز وبـ تتوجد الحاجة لمتخصص في مجال ما علشان يفهم أعضاء اللجنة المعنية الدنيا بـ تمشي إزاي في أعمال لجنتهم وكده.

وهنا ممكن تستفيد من:

1- مؤسسة "معًا": كونهم شغالين في مجال التأهيل الوظيفي وهـ تلاقي عندهم مدربين متخصصين وأصحاب كفاءة عالية في مجالات زي الـ "HR" و الـ "PR" والـ "Fund Raising" والـ "Social Media" والـ "Marketing"، تقدر تتواصل معاهم من خلال صفحتهم على الفيسبوك.

2- فريق "أنوار رسالة"، وده الفريق المسؤول عن التدريب وتنمية المتطوعين في جمعية رسالة للأعمال الخيرية، هـ يقدروا يفيدوك برضه، تواصل معاهم من خلال صفحتهم على الفيسبوك.

3- أو تروح لجهة متخصصة في التدريب اللي أنت عاوزه، يعني مثلًا لو محتاج مدربين في مجال الميديا، تشوف جهة مسؤولة عن التدريب الإعلامي وتتفق مع حد هناك يساعدك.. وهكذا.

وأخيرًا كده نقول ملحوظة ممكن تكون مفيدة جدًا.. تقدر توفر على نفسك وقت ومجهود كبير جدًا وتحقق استفادة عالية للأعضاء بتوعك (وللمجتمع أكيد) لو ركزت في أنك تدور على اللي شبهك وبـ يشتغل في نفس المساحة اللي أنت شغال عليها أو مساحة قريبة منها، وتتعاون معاه داخليًا وخارجيًا، هـ يساعدك جدًا في عملية البحث دي الجهات اللي بـ تهتم بتقديم خدمة التشبيك المجتمعي (Social Networking) زي كثير من مساحات العمل المشتركة، وهـ نحاول هنا في كايرو 360 قريب أننا نعمل دليل شامل لمجموعة الوظائف المجتمعية اللي شغالة عليها الأنشطة الطلابية ومؤسسات العمل العام إن شاء الله.

ربنا يجعلها سنة موفقة وناجحة ومفيدة للجميع!