The Definitive Guide to Living in the Capital , Cairo , Egypt

أغلب الأنشطة الطلابية بتكون في الجامعات، كان جديد علينا نسمع عن نشاط محترف جدًا بيقوم به مجموعة من طلاب المدارس، نشاط أشبه بالأنشطة اللي بيقوم بها طلاب الجامعات المصرية، وعلشان كايرو 360 بتهتم بكل حاجة بتحصل في القاهرة، وبتشجع الناس تكون إيجابية وتعمل حاجة مختلفة قررنا نروح في زيارة لمدرسة طه حسين الرسمية للغات في المطرية، هناك قابلنا مجموعة مميزة من الشباب المصري سنهم بين 14 و16 سنة، بيحاولوا يغيروا الصورة النمطية عن الجيل الجديد اللي بتقول أنه جيل كسول ومش مجتهد.

الشباب دول كونوا فريق مكون من عدد من طلاب مدرستهم، وأطلقوا عليه اسم "فريق تقدم" والهدف من الفريق يكون نقطة نور لطلاب المدرسة ويخليهم يسبقوا سنهم ويفهموا الدنيا صح علشان بعد كده يقدروا يحددوا مستقبلهم ويكونوا مؤهلين لاختيار كليات مناسبة تساعدهم ينجحوا في مستقبلهم ويحققوا كل أحلامهم.

الفريق بيعمل إيه؟

فريق تقدم بيعمل ورش تنمية بشرية، ودروات تدريبية في مجالات كتير زي الإتيكيت وتنظيم الوقت، وبيختاروا الأجازات علشان يمارسوا كل أنشطتهم، ويومهم دايمًا بيبدأ بممارسة الرياضة البدنية وبعدها بتبدأ المحاضرات وتبادل الأراء والمناقشات ثم ورش عمل.

لما اتكلمنا مع الفريق حسينا بأمل حقيقي وفخر، حاجة تخليك تشوف النور في نهاية النفق، والجميل أن كلهم أكدوا أن اللي شجعهم على الأنشطة دي مديرة مدرستهم الأستاذة سامية النوبي.

مصر مليانة مشاكل، كلنا معترفين بكده، لكنها مليانة كمان تجارب ومحاولات للنجاح والتميز، وبنكون سعداء جدًا لما بنلاقي شباب مصري مجتهد عايز يحقق حاجة وينجح، تحية لكل شاب مصري بيقول "أنا المستقبل".