The Definitive Guide to Living in the Capital , Cairo , Egypt

مطاعم
مطعم باب اليمن

مطعم باب اليمن: أحلى فراخ مندي في الدقي

  • المطعم فى 63 شارع الدقى – أمام شارع مصدق وبنزينة التعاون
تم التقييم بواسطة
Mostafa Fathi Abdelfadil
قيم
قيم الآن
مطعم باب اليمن: أحلى فراخ مندي في الدقي

المطاعم اللي بتقدم أكل يمني لها عشاقها  في القاهرة، وكل يوم بنسمع عن افتتاح مطعم جديد، قررنا نروح زيارة لمطعم باب اليمن في الدقي اللي تم افتتاحه مؤخرًا، وتجربتنا هناك كانت مليانة مفاجآت.

المحل فخم جدًا من حيث الديكورات ومساحته كمان كبيرة، عبارة عن دورين، الدور الأول للتيك أواي ولزوار المطعم اللي مش مهتمين أن يكون فيه خصوصية في القعدة، يعني لو مجموعة شباب أصحاب أو حد لوحده يقدر يقعد في الدور الأرضي، أما الدور الثاني فبيمتاز بخصوصية شديدة  للعائلات ولكل اللي بيحب الخصوصية.

أول ما قعدنا على الترابيزة الويتر قدم لنا طبق شوربة “لحم ضاني” وقال لنا أن ده مجاملة من المطعم، والحقيقة أنه كان دسم جدًا وماقدرناش نكمله للآخر، لكن طبعًا كانت لفتة حلوة منهم أنهم يرحبوا بينا بطبق شوربة يمنية.

اختارنا من المنيو الطبق الرئيسي الفراخ المندي اللي مشهورة بيها المطاعم اليمنية بشكل عام، فطلبنا نصف فرخة مندى سعرها “40 جنيه” الحقيقة كانت مستوية بشكل حلو قوي وتوابلها كانت مظبوطة إلى حد كبير، طلبنا معاها طبق أرز بسمتي مطبوخ على البخار عجبنا جدًا وده سعره “15 جنيه” ، الطبق التاني حبينا يكون مختلف عن اللحوم والفراخ المندي فطلبنا سمكة مشوية على الطريقة اليمنية ودي سعرها “50 جنيه” طعمها عجبنا جدًا برضه لأنها مختلفة كتير عن السمك المشوي اللي متعودين عليه في مطاعم القاهرة، توابل مختلفة ومضبوطة والسمكة مخلية من الشوك بنسبة كبيرة ومشوية على نار هادية، طلبنا جنب السمك طبق سلاطة كبير وده سعره “12 جنيه” ودى الحاجة الوحيدة اللي تحفظنا عليها في المطعم لأنها ماعجبتناش نهائي لأنها كانت عبارة عن خس كابوتشة مع جزر قليل قوي يعني لا فيها خيار ولا طماطم أو بقدونس زي ما كنا متوقعين، بالإضافة إلى أن ملحها كان قليل جدًا.

التجربة كانت لطيفة إلى حد كبير ولفت نظرنا جدًا اهتمام المكان بالنظافة خاصة نظافة الحمامات واختيار الإدارة للويترات اللي واضح جدًا انهم فاهمين شغلهم ومتدربين عليه كويس، وده كان  باين في استقبالهم لنا وعرضهم للمنيو اللي كان بالنسبة لنا غريب شوية لأن فيه أصناف كتير ماكناش فاهمين مكوناتها والويتر شرحها لنا كلها، في النهاية لو حبيت تجرب الأكل اليمني اللي على أصوله كايرو 360 بترشح لك باب اليمن وإحنا هنكرر التجربة دي تاني قريب علشان نعرف المكان هيحتفظ بمستواه ولا لأ وبرضه هنبلغكم.

نصيحة 360

ممكن الأسعار تكون اتغيرت مؤخرًا

أحسن حاجة

النظافة وتعامل الموظفين الراقي.

أسوأ حاجة

بلاش تجرب السلاطة وسيبك من شوربة اللحم الضاني

hassan2005abady

مطعم باب اليمن جيد فى المكان والضيافة والخدمة والهدوء الديكورات والإضاءة تحفة فنية *لكن اهم شئ وهو الطعام سئ جدا وغالى جدا *مدير الصالة ( شيفت مسائى) قليل الخبرة واللياقة *نشعر بأنه تم النصب علينا بسبب اننا طلبنا 4/1 تيس مقابل 375 جنيه *و أتوا الينا بلحوم حوالى 1كيلو .. اين هذا التيس الذى يزن 4 كيلو *وأصر مدير الصالة أن هذا هو المطلوب بالتمام وانه يكفى ثلاثة اشخاص *وطبق سلاطات مشكلة ب 40 جنيه *حقيقةً لقد دفعنا الحساب 650 جنيه ** ثم تناولنا العشاء فى الخارج لاننا لم نشبع اطلاقا *** لن نكرر هذه التجربة مرة اخرى‏****

أكتب تقييم

One thought on “مطعم باب اليمن: أحلى فراخ مندي في الدقي

  1. مطعم باب اليمن جيد فى المكان والضيافة والخدمة والهدوء
    الديكورات والإضاءة تحفة فنية

    *لكن اهم شئ وهو الطعام سئ جدا وغالى جدا
    *مدير الصالة ( شيفت مسائى) قليل الخبرة واللياقة
    *نشعر بأنه تم النصب علينا بسبب اننا طلبنا 4/1 تيس مقابل 375 جنيه
    *و أتوا الينا بلحوم حوالى 1كيلو .. اين هذا التيس الذى يزن 4 كيلو
    *وأصر مدير الصالة أن هذا هو المطلوب بالتمام وانه يكفى ثلاثة اشخاص
    *وطبق سلاطات مشكلة ب 40 جنيه
    *حقيقةً لقد دفعنا الحساب 650 جنيه ** ثم تناولنا العشاء فى الخارج
    لاننا لم نشبع اطلاقا
    *** لن نكرر هذه التجربة مرة اخرى‏****

أضف تعليقاً

يجب أنت تكون مسجل الدخول لتضيف تعليقاً.

مقترح