The Definitive Guide to Living in the Capital , Cairo , Egypt

تجمع أشهر أبطال قصص
الكوميكس DC Comics مع بعض في فيلم واحد ممكن يخلينا نبدأ نقلق من أن
الأفلام اللي شفناها قبل كده –من نوعية تجميع أبطال كثير في فيلم واحد– ما يبقاش
على قد المستوى، لكن المشاهدة واحدة هي الفيصل وهـ تحقق المفروض توقعه على الأقل
في الفيلم ده.

مكعب فضائي غامض،
يلاقيه القائد “نيك” فـ يبدأ في التخطيط لمشروع ضخم من خلاله –بدون ما
نعرف المشروع الضخم ده إيه– لكن فجأة يظهر من المكعب ده “لوكي” –أخو أحد
أبطال الكوميكس المشهورين “ثور”– ومهمته هي السيطرة على الأرض لحساب
فضائيين، وطبعًا الانتقام من “ثور”، ده طبعًا بعد الاستيلاء على المكعب
الفضائي الأخضر، هنا ما يبقاش أمام “نيك” غير تجميع كل أبطال القصص
المصورة المشهورين زي Captain America وIron Man وThe Hulk وغيرهم علشان يحاولوا يقضوا على “لوكي”
وأتباعه، وبعد العديد من المغامرات، يتم اكتشاف الغرض من رغبة القائد
“نيك” في استرجاع المكعب الفضائي الأخضر وهو عمل أسلحة دمار شامل من
خلاله، طبعًا يبقى أبطالنا بين نارين وهو محاولة القضاء على “لوكي”،
والتخوف من استغلال البشر لنفس المكعب الفضائي اللي عند “لوكي”، وطبعًا
تستمر الأحداث بدون توقع للنتيجة.

الحقيقة يعيب الفيلم
هو طول مدته الزمنية وتجاوزه للساعتين! خاصة في الجزء الأول منه، وهو محاولة إقناع
أبطال القصص المصورة بضرورة العودة وإنقاذ الأرض، لكن يفضل الجزء الثاني وهو
محاربة “لوكي” وأتباعه من أكثر المشاهد تشويقًا، خاصة دخول الفضائيين
اللي يتبعوا “لوكي” الأرض ومحاولتهم القضاء على البشر.

المميز كمان في الجزء
ده هو الحوار اللي بـ يعبر عن الصراع الداخلي للشخصيات، زي الحوار اللي دار بين
“ثور” و”لوكي”، أو الحوار الدائر بين “لوكي” وهو
محبوس والأرملة السوداء أو “ناتاشا رومانوف”، غير أنه يتميز بالطابع
الكوميدي المحبوب، زي محاولة مواجهة “لوكي” لـ The Hulk في تتابعات نهاية الفيلم، وده يمكن أساسه أن كاتب السيناريو
والمخرج واحد وهو جوس دين.

يفضل الفيلم واقع في
منطقة تجميع لأبطال القصص المصورة، مع الوعد بجزء ثاني، في حالة طبعًا تعرض الأرض
–زي ما هو متوقع– للخطر.