The Definitive Guide to Living in the Capital , Cairo , Egypt

المفكر الأمريكي الكبير نعوم تشومسكي كان في محاضرة أخيرة له في القاهرة، وكانت النقطة الأساسية اللي أكد عليها خلال الندوة أن الناس شاغل تفكيرها الحروب والقتل، ومش بـ يفكروا في التغييرات المناخية اللي هـ تقتل مع الوقت أعداد ضخمة من البشر يمكن تكون أكبر من إجمالي اللي قتلتهم وهـ تقتلهم الحروب والنزاعات المسلحة حول العالم.

في كتابه بـ يحاول د. فتح الله الشيخ أنه يرصد محاولات العلماء حول العالم في المجال ده، وبـ يقول أن الأخطار اللي بقت بـ تهدد الحياة من حروب نووية وتغييرات مناخية، واحتمالات اصطدام مذنبات وكويكبات بالأرض، وده طبعًا غير الأخطار المتعلقة بالتجارب التكنولوجية والعلمية حول العالم، واللي ممكن تفني العالم في لحظة لو أخطأت زي اللعب في التكنولوجيا الحيوية واللعب في أساس الحياة الـ DNA.
مش كثير يعرفوا أن فيه حاجة اسمها “ساعة القيامة” تم إنشائها في الولايات المتحدة ودي ساعة أشارت لها مجلة أمريكية متخصصة عبرت عن الأخطار اللي بـ يمر بها كوكب الأرض، وعليه تم إنشاء ما سمي بـ “ساعة القيامة الافتراضية” ودي بـ تشير للأخطار اللي بـ تدور حول الإنسان على الأرض، لحد المرحلة اللي بـ تستحيل الحياة معاها على الكوكب، الساعة دي شغالة من 1945م من بعد الحرب العالمية الثانية.
لحد دلوقت مافيش تجربة ناجحة 100% للحياة في مكان آخر غير كوكب الأرض لكن المحاولات مش واقفة، قمر صناعي هنا، مركبة فضاء هناك، اكتشافات ومحاولات، كلها مرصودة في الكتاب اللي القارئ هـ يخرج منه مش بس بمعلومات عن محاولات ارتياد الفضاء، لكن بمعلومات وفيرة عن الخطر اللي إحنا عايشين فيه، وحجم الكارثة اللي الكرة الارضية ككل مقبلة عليها، إيف كوري –مؤلفة فرنسية وابنة ماري كوري- بـ تقول: “لقد اكتشفنا أن السلام بأي ثمن ليس سلامًا على الإطلاق، وأن الحياة بأي ثمن ليست ذات قيمة بأي حال من الأحوال، وأن الحياة لا تساوي شيئًا من دون مزاياها ومن دون الإحساس بالفخر والحقوق، ومن دون البهجة التي تجعلها تستحق أن نحياها وأن نمنحها للآخرين، واكتشفنا كذلك أن هناك شيء أكثر ترويعًا ورهبة من الحرب والموت.. أنه الحياة في خوف وهلع”.