The Definitive Guide to Living in the Capital , Cairo , Egypt

الأفلام اللى بـ تتكلم عن نشأة الإنسان والإنسانية، وتطور العلوم على الأرض والمعرفة الإنسانية بـ تحتل عندنا طوال الوقت مساحة خاصة جدًا، لأنها أفلام بـ تحاول تلقى الضوء العلمي على كيفية نشأة الحياة على كوكب الأرض، وإيه اللى ممكن يحصل بعد مئات أو حتى آلاف السنين. كل ده من خلال جو من الأكشن الممزوج بالخيال العلمي، الأمر اللى مش بـ يدفع المشاهدين للملل، و”لوسى” من نوعية الأفلام دي، ونقدر نقول أنه واحد من أفضل الأفلام اللى شوفناها خلال الموسم الحالى.

من إخراج وتأليف لوك بيسون بـ يبدأ الفيلم بمشاهد افتتاحية عن كيفية تطور الحياة على كوكب الأرض، بداية من قرد بدائى بـ يلعب فى بركة من الماء وحتى وصول الإنسان لبناء ناطحات السحاب وصناعة الطائرات ومكوكات الفضاء، المشاهد بـ نشوفها من خلال تعليق الدكتور نورمان (مورجان فريمان) اللى بـ يشرح كيفية حدوث التطور فى عقل الكائنات الحية للوصول لاستخدامها 10% من قدرات عقلها، وهي النسبة اللى بـ يستعملها الإنسان العادي حاليًا واللى مكنته من اختراع كل الآلات اللى حوله والسيطرة على باقى الكائنات وتطويعها فى خدمته.

فى نفس الوقت بـ نشوف مشاهد لكيفية تورط لوسى (سكارليت جوهانسن) فى عملية تهريب مخدرات، بـ تحطها تحت رحمة مجموعة من مهربى المخدرات الصينيين عديمي الرحمة، بـ يزرعوا كيس من المخدرات الجديدة شديدة التأثير داخل معدتها بعملية جراحية، وبـ يطلبوا منها تهرب المخدرات لدولة ثانية.

الأمور بـ تتعقد بعد كده لحد ما بـ نوصل لمرحلة أن جسد لوسى بـ يمتص كمية المخدر بالكامل، الأمر اللى بـ يزود قدرات دماغها لدرجة أنها بـ تستعمل 100% منه بالتدريج التصاعدي على مدى أحداث الفيلم، الأمر اللى بـ يعطيها قدرات خارقة. وبـ تستمر الأحداث اللى مش عاوزين نحرقها عليكم أكثر من كده.

الإبهار والخدع السينمائية لعبت دور مهم جدًا فى أحداث الفيلم، وخصوصًا المشاهد الأخيرة اللى بـ تورينا فيها لوسى تطور العالم بالمقلوب، من الأحدث للأقدم… من ناطحة السحاب حتى الكوخ البدائى، ومن رائد الفضاء حتى القرد البدائى فى البحيرة، كلها مشاهد شوفناها بدون مؤثرات الـ 3D اللى لو كانت موجودة كانت هـ تفسد متعة المشاهدة عندنا.

من الأمور اللى ما عجبتناش فى أحداث الفيلم، الإغراق فى الخيال فى الربع الأخير، وتحول الفيلم من فئة الخيال العلمي للفانتازيا، لكنه أمر مقبول مع كم “اللعب فى الدماغ” اللى حصل لنا فى النصف الأول من الفيلم، وكيفية الانتصار من خلال أحداث الفيلم للإنسان وقدراته العقلية وقدرته على التلاعب بالكون من حوله لو فقط أتيحت له الفرصة أنه يستخدم عقله للحد الأقصى له.

تدرجات الفيلم بين كل نسبة من نسب استعمال لوسى لعقلها، فكرنا بسيناريوهات ألعاب الفيديو جيم، وإزاى بطل اللعبة بـ تزيد مهارته مع تجاوز كل مرحلة صعبة فى أحداث اللعبة، ونعتقد أن الوقت مش هـ يمر كثير قبل ما يتحول لوسى للعبة على أجهزة البلاي ستيشن وغيرها، أو حتى الاتفاق على إنتاج جزء جديد من أحداث الفيلم.

مشاركة عمرو واكد فى أحداث الفيلم كانت ضعيفة للغاية، دوره كضابط شرطة (بيير ديل ريو) كانت ضعيفة جدًا ولا ترقى حتى لمستوى الممثل المساعد، لكن الأمر الإيجابى فى مشاركة واكد فى الفيلم أن قد تكون أول مرة يكون دور ممثل عربى مصري فى أحد أفلام هوليوود مالوش علاقة بالإرهاب أو التفجيرات، بل على العكس يظهر كرجل شرطة بـ يكافح لتطبيق القانون، ونعتقد أن دى السكة اللى هـ يمشى عليها أمثال عمرو واكد أو خالد النبوي لرفع اسم الفن المصري فى هوليوود، وهو شىء عظيم بـ نشجعهم عليه وبـ نتمني لهم التوفيق.

على الرغم من صغر دور مورجان فريمان إلا أنه كان مؤثر وله حيوية كبيرة، فريمان بـ يقدر يثبت فى كل مشهد بـ يؤديه أنه أستاذ تمثيل حقيقي، مهما كان دوره صغير، لكن خدمة الدور من خلال الموسيقى التصويرية وزوايا التصوير كان أكثر من رائع، وبما أننا بـ نتكلم عن الموسيقى التصويرية، لازم نقول أنها كانت متميزة، خصوصًا مشهد المطاردة فى الشوارع فى سيارة عمرو واكد، الموسيقى تماهت مع الموقف ورفعت درجة حماسنا للنهاية.

أفضل ما قدمه فيلم لوسى ما كانش فى دار العرض نفسها! لكن فى المناقشة الحامية اللى شوفناها على باب السينما بعد نهاية الفيلم، بين مجموعة من الشباب اللى وقفوا يتناقشوا عن نظرية التطور وتحكم الإنسان فى الطبيعة ومؤلفات داروين وآينشتاين! أسئلة كثيرة سابها الفيلم فى خيالنا وأثارت حالة من النقاش خارج دار العرض، طبعًا ما فوتناش الفرصة وشاركنا فيها… لكن ده موضوع ثانى.