دليل أحداث نهاية الأسبوع: حفل أراجيد والأخوة أبو شعر ورشا يحيى وفرقة ع الرصيف
Cairo 360
كالعادة كل حاجة حلوة بـ تخلص بسرعة، وزي ما رمضان خلص بسرعة، العيد كمان خلص أسرع، والناس رجعت شغلها ثاني، وكعادة فريق كايرو 360 بـ يحاول يوفر لكم أنسب الأحداث اللي تخليكم تستمتعوا بالويك إند بتاعكم لأقصى درجة.
نبدأ بيوم الخميس، لو بـ تحب الموسيقى بكل أنواعها شوف علبة ألوان في الزمالك عاملة عرض موسيقي بـ يجمع بين عدة آلات موسيقية بعنوان "حوار". وسعر التذكرة 25 جنيه. كمان فيه في ساقية الصاوي حفل موسيقي للفنان مصطفى حسين، وسعر التذكرة 25 جنيه لغير الأعضاء و20 جنيه لأعضاء الساقية.
أما لو بـ تحب الموسيقى النوبي روح قاعة النهر في ساقية الصاوي برضه، هـ تستمتع بحفل موسيقى نوبية هـ تقدمها فرقة "أراجيد". وسعر التذكرة 20 جنيه.
لكن لو عاوز تشوف حاجة جديدة خالص فيه في مسرح الضمة حفل لفرقة الرانجو مع مجموعة من أغاني الزار المصري السوداني. وسعر التذكرة 30 جنيه عند الباب، وعند الحجز المسبق 20 جنيه.
وننتقل ليوم الجمعة، وحفل موسيقي لفرقة "زومباكاشا" في علبة ألوان في الزمالك. وسعر التذكرة 25 جنيه.
ولو عاوز تسترجع روحانيات رمضان ساقية الصاوي بـ تساعدك بحاجتين، أولًا ندوة بعنوان "وماذا بعد رمضان؟" في قاعة الكلمة وهي ندوة للداعية محمد أيوب، واللي هـ يتكلم فيها عن كيفية مواصلة روحانيات شهر رمضان بعد انتهاء الشهر الكريم، والدعوة عامة. ثانيًا بقى الروحانيات والجمال كله في حفل موسيقى تقدمه "فرقة الأخوة أبو شعر" في قاعة النهر، واللي هـ تقدم مجموعة من الأناشيد الدينية. وسعر التذكرة 30 جنيه لغير الأعضاء بساقية الصاوي و25 جنيه للأعضاء.
أما لمحبي الفن الحقيقي وعزف الفيولا فيه على المسرح المكشوف بدار الأوبرا المصرية ضمن المهرجان الموسيقي الغنائية بمناسبة الموسم الصيفي. حفل تحييه عازفة الفيولا رشا يحيي، والتذاكر متاحة بشباك الحجز. وكعادة كل يوم جمعة، وعرض الأراجوز وخيال الظل في مركز إبداع بيت السحيمي والدعوة عامة.
ونختم بيوم السبت وحفل موسيقي لفرقة "ع الرصيف" بقاعة الحكمة بساقية الصاوي، وسعر التذكرة 35 جنيه لغير أعضاء الساقية، و30 جنيه للأعضاء، وكمان في الساقية برضه بس في قاعة الكلمة فيه ندوة دينية بعنوان "الدرويش القلندري: الرموز والعلامات في الأديان" مع أحمد عبد الجواد وأحمد رمزي. والدعوة عامة.
أما لمحبي الفن بكل أنواعه جاليري دروب عاملة معرض جماعي بـ يضم أعمال حوالي 50 فنان. وتقدروا تشوفوا مقالنا النقدي عنه من هنا.
ونختم بمعرض "سينيمانيا" اللي هـ يضم مجموعة من أفيشات الأفلام الكلاسيكية المرسومة يدويًا من قبل مجموعة من الفنانين المعاصرين زي فادي جلال، ومحمد مسعد، ونورا سليم وغيرهم في درب 1718. والدعوة عامة.
لو عاوزين تعرفوا أكثر عن أحداثنا اللي بـ ننشرها كل يوم على مدار الشهر، تقدروا تتابعوا أجندتنا.
ويك إند سعيد!
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
