The Definitive Guide to Living in the Capital , Cairo , Egypt

من تاني هترجع الفعاليات الفلكلورية تزور أجندتنا علشان ترضي عشاق الفنون الشعبية وروحها الأصيلة.. بالإضافة لمجموعة فعاليات تانية هتفتح باب الاختيار لو حد حابب يشوف سكة مختلفة.

البداية هتكون من الفعالية الأبرز النهارده من المركز المصري للثقافة والفنون "مكان" اللي هيستضيف حفل فلكلوري من جنوب مصر مع فرقة من جعافرة أسوان بقيادة الفنان "سيد ركابي"، سعر تذكرة الحضور 30 جنيه والبداية هتكون الساعة 8:00 مساءً، لكن التذاكر بتكون متاحة قبلها بشوية ويفضل الحضور بدري ساعة وللا حاجة علشان تضمنوا التذاكر والمكان.

وجمهور المراكز الثقافية هيكون على معاد مع فعالية مميزة جدًا بالنسبة له برضه، من جاردن سيتي وتحديدًا في مركز دال للأبحاث، اللي هيستضيف النهادره ندوة ثقافية بعنوان "التعايش والعدالة في المراحل الانتقالية بين التجارب الدولية والواقع المصري"، هيدير الندوة مجموعة من خبراء السياسة والاجتماع بالإضافة لبعض الحقوقيين.. الدعوة عامة، والبداية هتكون الساعة 7:00 مساءً.

بالإضافة لاستمرار فعاليتين من أيام سابقة ومكملين معانا شوية.. مسرحية "ليلة من ألف ليلة" للفنان الكبير يحيى الفخراني، اللي هتبدأ الساعة 9:30 في المسرح القومي بالعتبة وأسعار تذاكرها بتتراوح بين 30 و 100 جنيه.. وكمان فعالية "مصيف الساقية" اللي بدأت امبارح وهي أشبه بمهرجان بيضم مجموعة كبيرة من الأنشطة الفنية والثقافية والترفيهية في قاعة النهر بساقية الصاوي في الزمالك، الأنشطة اللي بتفضل شغالة يوميًا في الفترة ما بين 9:00 صباحًا و 9:00 مساءً، وسعر تذكرة حضور اليوم الواحد بتكون 15 جنيه.

يللا خلص التزاماتك، وانطلق!