The Definitive Guide to Living in the Capital , Cairo , Egypt

مؤخرًا لاحظنا وجود عدد معقول من الأفلام اللي بتناقش من خلال أحداثها فكرة فلسفية مختلفة. والحقيقة أن دي حاجة إيجابية بتخلينا نشوف الفيلم بعمق ونكتشف فيه أبعاد كتير للمشاهدة مش مجرد قصة بوجهة نظر مباشرة. تعالوا نتعرف أكتر على فيلم The Killing of a Sacred Deer.

القصة

الفيلم بيحكي عن جراح شهير وناجح بيعيش حياة سهلة وجميلة مع أسرته السعيدة. حياة بيتمناها عدد كبير من الناس ومن مشاهدي الفيلم، لكن الحياة السهلة دي بتخبي وراها سر كبير، وده اللي بنعرفه مع استمرار أحداث الفيلم وخاصة مع ظهور شخصية جديدة في الأحداث بتقلب وتغير حياة الأسرة بصورة كبيرة مش عاوزين نحرقها عليكم.

فريق العمل

الفيلم من تأليف وإخراج يورجوس لانثيموس ومن بطولة مجموعة مهمة من النجوم منهم نيكول كيدمان وكولن فاريل وأليسيا سيلفرستون ورافي كاسيدي وبيل كامب وباري كيوجان.

الأداء التمثيلي

المميز في الأداء التمثيلي لكل بطل من أبطال الفيلم أنه كان عارف كويس أبعاد الشخصية اللي بيقوم بيها، والإسقاطات الفلسفية اللي بيحملها الدور، وفي نفس الوقت قدرت كل شخصية من الشخصيات إنها تقوم بالدور المطلوب منها بشكل سلس وسهل ودون تعقيدات لا مبرر لها، والحقيقة أن ده لو نجاح لفريق التمثيل فهو كمان نجاح كبير للإخراج.

السيناريو والحوار والإخراج

سيناريو الفيلم قدر يخلينا نمر من كتير من المشاهد الصعبة والمعقدة بسهولة ويسر، وده شيء يحسب لورق الفيلم وكتابته بشكل عام، كمان مخرج الفيلم – وهو أيضًا المؤلف – قدر يتعامل مع الفيلم ويقدمه للمشاهدين على  أكتر من مستوى للمشاهدة وكلهم كانوا ناجحين جدًا وده شيء يحسب له زي ما قولنا.

الديكورات والموسيقى والأزياء

ديكورات الفيلم والموسيقى التصويرية الخاصة به كانت من أصعب الأمور وأهمها في الأحداث لأن كان لها دلالات كبيرة على منطقة الإسقاطات في الأحداث. كمان الموسيقى بالذات لعبت دور مهم علشان تمتعنا وتخلينا نحس  بالفيلم ونشعر بالصدمة في بعض المشاهد، وده من الأدوار المهمة اللي لعبتها الموسيقى في الفيلم.

الخلاصة

فيلم The Killing of a Sacred Deer يستحق المشاهدة لو كنت من محبي الأفلام اللي فيها إسقاطات واللي بتحفز ذهنك على التفكير في الأحداث وتفاصيل كل مشهد من المشاهد.

علشان تبقى عارف:

الفيلم يعتبر ثاني تعاون بين النجم (كولين فاريل) والمخرج اليوناني (يورجوس لانثيموس).