دليلك للأفلام اللي هتعرضها سينمات القاهرة في عيد الأضحى 2018
أحمد مراد أفلام أفلام العيد البدلة الديزل الكويسين بني آدم بيكيا تراب الماس سوق الجمعة سينمات
Mohamed Hamdy
على الرغم من أننا بقى لنا فترة طويلة متعودين على أن مواسم الأعياد مش بينزل فيها أفلام قوية في الغالب، لأن منتجي ومخرجي الأفلام التقيلة بيحبوا يبعدوا بيها عن (معجنة) الأفلام في مواسم الأعياد، لكن من الواضح أن سنة بعد سنة موسم عيد الأضحى بيكتسب قوة وزخم من حيث نوعية الأفلام المعروضة فيه. تعالوا نتعرف أكتر على الأفلام اللي بتتنافس على عيديات عيد الأضحى 2018!
تراب الماس
واحد من أهم الأفلام اللي ناس كتير مستنياها. السبب الأول هو أهمية الفيلم علشان مؤلفه أحمد مراد. شاب صغير في السن نسبيًا قدر يحقق نجاح مميز ويفرض اسمه كواحد من أشهر الروائيين الشباب في مصر مؤخرًا. روايته الفيل الأزرق تحولت لفيلم سينمائي كسر الدنيا حرفيًا (اتعرض في موسم عيد الأضحى 2014) ومن الواضح أن نفس الفريق (أحمد مراد في التأليف ومروان حامد في الإخراج) قرروا يعيدوا النجاح تاني مع تراب الماس. مع فريق عمل بيضم أسماء بحجم ماجد الكدواني ومنة شلبي وآسر ياسين. منة وماجد شاركوا قبل كده في بطولة فيلم (الأصليين) اللي كتبه مراد برضه.
تراب الماس بيحكي عن شاب بيشتغل مندوب في شركة أدوية بيتعرف على حاجة اسمها تراب الماس، الأمر اللي بيدخله في عالم شديد التعقيد من العلاقات بين المال والسلطة في مصر.
الديزل
“رايحين فين أنا الملك.. نادي الملوك من فيكم مشترك؟!” بالطريقة دي بيعبر محمد رمضان عن نفسه في أغانيه اللي بتثير كتير من الجدل (وملايين المشاهدات على يوتيوب) لكن هل هيقدر يحصد نفس النجاح في صالة العرض؟ فيلم الديزل هو أحدث أفلام محمد رمضان اللي بيوصف نفسه دايمًا أنه (نمبر وان) في عالم التمثيل.
في الديزل رمضان بيعلب دور دوبلير خاطب بنت بتشتغل مساعدة لفنانة مشهورة، لكن الأحداث بتتطور على عكس المتوقع تمامًا وبتاخدنا لمنطقة جديدة ومختلفة من الأحداث. الديزل من إخراج كريم السبكي وبيشارك رمضان البطولة فتحي عبد الوهاب وهنا شيحة وشيماء سيف.
البدلة
وبعد نجاحه الكبير في الكليبات اللي قدمها مؤخرًا، تامر حسني بينزل ساحة التمثيل من جديد مع فيلم البدلة، وبيشاركه البطولة أكرم حسني اللي حقق نجاح كبير في مسلسل الوصية رمضان اللي فات وماجد المصري وأمينة خليل وغيرهم.
البدلة بيحكي عن شاب (تامر حسني) بيتلقى دعوة حضور حفلة فبيروح لابس بدلة ضابط، الأمر اللي بيدخله في سلسلة من المواقف الكوميدية وغير الكوميدية اللي بتتفجر مع الأحداث.
البدلة من إخراج محمد جمال العدل وتأليف أيمن بهجت قمر.
بني أدم
يوسف الشريف بعد ما فضل ما يقدمش دراما في رمضان الماضي علشان يتفرغ لفيلمه الجديد، وبعد الدعاية المكثفة اللي شاركت فيها الإستايلست والمؤلفة انجي علاء، واللي قدرت تخلينا منتظرين الفيلم على أحر من جمر.. أخيرًا هنشوف فيلم بني أدم في عيد الأضحى 2018 واللي بنتوقع أنه يكون من أهم الأحصنة المنافسة في السباق. الفيلم من إخراج أحمد نادر جلال اللي صنع مسلسلات رائعة مع يوسف الشريف، والفيلم من تأليف عمرو سمير عاطف اللي بيشكلوا مع بعض ثلاثي (أحمد ويوسف وعمرو) متميز.
سوق الجمعة
من نفس الروح العامة لأفلام زي الفرح وكباريه وساعة ونصف.. بنشوف فيلم سوق الجمعة اللي أخرجه سامح عبد العزيز وألفه أحمد عادل سلطان عن قصة محمد الطحاوي. بناخد جولة على مدار أحداث الفيلم في سوق الجمعة وقصص الناس اللي بترتاد السوق.
سوق الجمعة من بطولة محمود الجندي و عمرو عبد الجليل (اللي قدم دور عمره في مسلسل طايع رمضان اللي فات) ودلال عبد العزيز و شمم الحسن.
الكويسين
أما الكوميدية في العيد فهتكون مع فيلم الكويسين.. مع عيله اسمها (كويس) اللي يشوفها من بعيد يحسب أنها عيلة عادية لكنها أبعد ما يكون عن العادية من خلال المواقف الكوميدية المميزة اللي بتحصل طوال أحداث الفيلم.
الكويسين من بطولة بيومي فؤاد وأحمد فهمي وحسين فهمي وشيرين رضا مع مشاركة من النجمات الشابات أسماء أبو اليزيد وتارا عماد وجيلان علاء. والفيلم من تأليف أيمن وتار وإخراج أحمد الجندي.
بيكيا
محمد رجب الممثل المجتهد راجع مع دور قوي وحاطين عليه أمال عظيمة. رجب بيقوم بدور عالم بيقوم بأبحاث في مجال علاج الأمراض المستعصية والخطيرة لكن بيتم التأمر عليه من منظمة أجنبية، الأمر اللي بيخليه يتنكر في شخصية جديدة لحد ما ينتهي من البحث الخاص به.
الفيلم من تأليف محمد سمير مبروك وإخراج محمد حمدي وبطولة أيتن عامر ومحمد لطفي وميرنا جميل.
مقترح
صحة ولياقة
اسكيت X.. أول أكاديمية في مصر بتعلم التزلج لأبطالنا من أصحاب الهمم!
أصحاب الهمم أكاديمية سكيت X +12
معالم وسياحة
