The Definitive Guide to Living in the Capital , Cairo , Egypt

مين فينا التكنولوجيا مش داخله في حياته بشكل واسع، أو السوشيال ميديا والتطبيقات المختلفة واخده نص وقته؟ طيب إيه رأيكم لو كان في تطبيق من التطبيقات الكتيرة اللي على موبايلاتنا دي يكون خاص بينا إحنا؟ وإحنا اللي نتحكم في محتواه وفي شكله؟

ده بالضبط اللي فكر فيه المبرمج المصري “مصطفى السعدني” واللي بدأ بفكرة إنه من حق كل واحد عنده فكرة مختلفة حابب يعرضها للناس، إنه يكون عنده تطبيق أو “أبلكيشن” على نظام التشغيل أندرويد، و100% مجانًا، ده بالعكس كمان، ممكن يحقق منه مكسب عن طريق الاشتراك في خدمة جوجل آد موبيل “Google Ad Mob”.  

أما نقطة البداية على أرض الواقع فكانت مشروع السعدني الإلكتروني فهو منصة “تكناوي” اللي حكالنا عنه بنفسه، وقالنا إن “تكناوي” عبارة عن خدمة سحابية افتراضية “cloud service” يعني ممكن تتصفح و تعمل ملفات من أي نوع من أي مكان في العالم، وبتحتفظ بشغلك كله على سيرفرات عالمية، مش على جهازك، يمكن علشان كده أكتر ناس هتستفيد منها هما مؤلفين الكتب، والصحفيين والمدونين، وأي حد عنده منتج أو فن أو فكرة عاوزهم يوصلوا للناس.

اللي شجع السعدني على الخطوة دي كان سببين، الأول هو خبرته في مجال تطوير النظم، والتاني هو إن في ناس كثير مهتمين بأن يكون عندهم تطبيق خاص بيهم على تلفوناتهم، خصوصًا لو كان عندهم مشاريع مختلفة، وعاوزين يوصلوا لكل عملاؤهم

الجميل في “تكناوي” إنها منصة خاصة، بتسمح للي عاوز يعمل تطبيق محترف لنفسه بنفسه، وبكل بساطه ومن غير حتى ما يكون دارس برمجة، أو ليه في التكنولوجيا.

منصة تكناوي بتقدم 3 خدمات للمشتركين فيها، أول واحده هي خدمة تكناوي للصحفيين والمدونين، واللي من خلالها يقدر أي صحفي أو مدون يعمل تطبيق أندرويد أو ويندوز فون مجانًا، وبالتالي ممكن من خلال التطبيق ينشر أي محتوى مكتوب، ويقدر يتحكم فيه عن طريق حسابه علي موقع تكناوي.

ثاني خدمة موجهه لمؤلفين الكتب، وبتديهم فرصة إنهم يحولوا كتبهم لكتب إلكترونية بصيغة (PDF) عن طريق التطبيق، وفي نفس الوقت يقدر الكاتب يحقق من التطبيق والقراء أرباح مادية عن طريق الإعلانات.

أما الخدمة الثالثة فهي “تكناوي إكسبرس”، ودي خدمة بتسمح لأي شخص يستخدمها إنه يعمل تطبيق ويندوز فون أو أندرويد.

لو عجبتكم الفكرة وحابين تعرفوا عنها أكتر وتجربوها، ممكن تدخلوا على صفحة “تكناوي” على الفيسبوك من هنا.