The Definitive Guide to Living in the Capital , Cairo , Egypt

صعب جدًا ومن النوادر، إنك تشوف فيلم كامل من مجاميعه في كل التفاصيل. فيلم يكون مسيطر على كل العناصر من قصة، إخراج، تمثيل، موسيقى.. إلخ. علشان كده لما بيظهر عمل بالشكل ده، لازم يسيب علامة. وفيلم Joker مش بس ساب علامة، ده هيبقى مرجع لسنين قدام في الشخصية دي تحديدًا.

الفيلم بيدور عن آرثر فليك “ووكين فينيكس”، ممثل كوميدي نصيبه محدود جدًا من النجاح، وبيعاني من بعض المشاكل النفسية. آرثر بيواجه صعوبات كتير في شغله وفي حياته الاجتماعية. ومع ضغوط المجتمع عليه باستمرار، بيتحول من شخص في حاله وماشي جنب الحيط.. للجوكر.

إحنا مش فاكرين إمتى كانت آخر مرة، دخلنا فيلم وخرجنا منه بالانبهار والانبساط ده. إيه الحلاوة والروعة والجمال دول؟ لو قولنا masterpiece مش هنوفيه حقه.

“?Is it just me, or is it getting crazier out there”

لازم نبدأ بالكلام عن الأداء الخرافي المذهل لووكين فينيكس. مش ممكن شخصية الجوكر تطلع بشكل أحسن من كده. تمكُن مذهل من الشخصية وأبعادها. قدر يورينا البعد الدرامي للجوكر، بشكل غير اللي اتعودنا عليه. إزاي إنه شخص عادي جدًا، لكن الظروف المحيطة بيه طلعت منه إنسان تاني مختلف. طبعًا كل ده لا ينفي إطلاقًا إعجابنا بدور الجوكر العظيم، اللي قدمه “هيث ليدجر” في فيلم (The Dark Knight).

التفاصيل اللي قدمها “فينيكس” كانت رائعة. من ضحكته المريبة، اللي توترك وتخوفك وبرضو تضحكك في نفس الوقت. لحركات جسمه، لرقصته.. كلها كانت مظبوطة بالملي، وبتمهدك مع الوقت للي جي من الأحداث. مفيش شك إن “فينيكس” رايح للأوسكار بالدور ده بدون منازع.

الإخراج كمان كان ممتاز. “تود فيليبس” قدم واحدة من شخصيات الكوميكس المعروفة، في فيلم درامي بحت، بعيد عن أجواء الأبطال الخارقين. عرف ينقلنا خطوة بخطوة مع تطور الشخصية. إزاي آرثر فليك اتحول للجوكر، وليه. خلانا نعرف المبرر ورا أفعاله، وفاهمين هو بيعمل كده ليه.

الصورة في الفيلم كانت روعة، في كادرات كانت عبارة عن لوحات فنية بمعنى الكلمة. خلت المشاهد الخالية من الحوار برضو جذابة. انت مش سامع كلام، لكن عينك مشدودة باللي شايفاه.

أما الموسيقى فحدث ولا حرج. كانت عاملة زي رشة الملح اللي بتظبط الأكلة. بتعيشك حالة كل مشهد كأنك جواه. ممكن تبقى فرحان وبتضحك، وفجأة تلاقي نفسك مشدود وعلى أعصابك.  

حقيقي فيلم Joker وجبة سينمائية متكاملة، مفيهاش أي نقصان. وشكل جديد لشخصية الجوكر ماشوفناهوش قبل كده. مالقيناش في الفيلم غلطة، فكان طبيعي نديله تقييم 5/5.