The Definitive Guide to Living in the Capital , Cairo , Egypt

معرض الكتاب حدث فريد بيحصل في السنة مرة واحدة، والسنة دي المعرض في دورته الـ51 فيه كتب جديدة وقديمة وحاجات نادرة أعادوا طبعها، يعني فرصة حقيقية لعشاق الكتب، وزي ما إحنا عارفين إنه للسنة التانية المعرض مقام في مركز مصر للمؤتمرات والمعارض الدولية في التجمع الخامس، وده ممكن يخلي ناس كتير مش قادرة تروح بسبب بعد المشوار، وعلشان كده قرر عمر ممدوح أنه يشحن الكتب من المعرض للي محتاجها لحد بيته، وفي السطور الجاية هنقولكم على تفاصيل مشروع X square لشحن الكتب من المعرض للي محتاجها في أي مكان في القاهرة.

من 3 سنين عمر وأخوه احمد قرروا يفتحوا شركة شحن تشتغل مع الشباب اللي بيعملوا هاند ميد، ويوصلوا شغلهم للعملاء بأسعار بسيطة، وفي مرة عمر كان له واحد صاحبه من ذوي الهمم محتاج يشتري كتب من معرض الكتاب، وطلب منه ده، وبعدين أكتر من حد طلبوا ده كأصدقاء، ومن هنا جت فكرة توفير خدمة توصيل الكتب لكل الناس اللي مش هتقدر تنزل تشتري سواء من المعرض أو من المكتبات ودور النشر.

بدأت الفكرة تتطور وتتبلور واشتغل الأخوين على محورين، الأول كان خاص بدور النشر اللي عرضوا عليهم الفكرة ووافقوا انهم يتعاملوا معاهم، والمحور التاني كان المؤلفين اللي كان بيبقى لهم ديزاين مخصوص بيوضح أن الكتاب متاح للبيع عن طريق خدمة التوصيل الخاصة بالشركة، وكمان ممكن تكون موقعة من المؤلف، ووقتها كان الربح بيكون بس من أسعار الشحن.

أما السنة التانية، لهم والأولى لمعرض الكتاب في التجمع، فقرروا يشتغلوا على نقطة بعد المكان والظروف اللي ممكن تمنع بعض الناس من التوجه للمعرض، وبدءوا يعملوا دعاية أن كل الكتب هتوصل في شنط معمولة بطريقة الأوريجامي، وبتتحول لأباجورة للحفاظ على البيئة، ورغم جمال الفكرة لكنها مانجحتش قوي، وبعدها فضلوا مصرين على النجاح وأطلقوا مبادرة الـ1000 قارئ، اللي بتهدف لتوصيل كتب لألف قارئ في القاهرة، وبدأ المشروع يكبر وينضم للفريق شباب تانيين بيشتغلوا في التصميم والتوصيل والسوشيال ميديا والكول سنتر.

 أما عن مصاريف الشحن فهي بتكون 30 جنيه داخل القاهرة والجيزة، و35 جنيه للمدن الجديدة، وأسعار الكتب بتكون زي ما هي من غير أي زيادة.

وتقدروا تطلبوا أي كتب محتاجينها من خلال صفحتهم على الفيسبوك من هنا.

ومن خلال الواتس آب على رقم 01021201714.