The Definitive Guide to Living in the Capital , Cairo , Egypt

الصور من الموقع الرسمي لمكتبة الإسكندرية

مكتبة الإسكندرية، هي منارة ثقافية مميزة في بلدنا، ورسالتها إنها تكون مركز مميز في إنتاج ونشر المعرفة، ومكان للتفاعل بين الشعوب والحضارات من خلال الثقافة، لكن المكتبة مش كتب وبس، دي فيها كمان 4 متاحف مهمة جدًا، هنعرفكم عليهم في السطور الجاية.

متحف السادات

هو المتحف الأول للرئيس الراحل محمد أنور السادات، وهو عبارة عن جناح كامل بمساحة 260 متر، وفيه هتقدروا تشوفوا خطابات السادات الأصلية، وأفلام وتقارير وصور، واستعراض كامل للوثائق اللي اختصت بعملية السلام في الشرق الأوسط، وفيه كمان أوسمة ونياشين خاصة ببطل الحرب والسلام، وأطباق ذهب وفضة وبرونز ونحاس.

كمان المتحف فيه ميداليات، وبدل مدنية وعسكرية، وكمان البدلة اللي استشهد وهو لابسها في 6 أكتوبر 1981، وده غير جهاز الراديو الخاص بيه، ومكتبته الشخصية اللي فيها أندر الكتب، ومكتبه الرئاسي، وصوره، والعصاية الشخصية اللي اشتهر بيها، ومجموعة من السيوف العربية، والدروع التذكارية، ده غير “البايب” الخاص بيه، والعباءة الشهيرة اللي كان بيلبسها لما يزور قريته.

وبيضم متحف السادات في مكتبة الإسكندرية 3 مسارج إسلامية ومسيحية ويهودية، ده غير تسجيل القرآن الكريم بصوته، وأوراق شخصية بتتضمن قصة قصيرة كتبها ومنها جزء بخط يده، ومجموعة نادرة من التسجيلات المرئية.

متحف المخطوطات

افتتح المتحف في 2001، وفيه أقسام مختلفة بتبرز التطور المعرفي العلمي، وهدفه التعريف بالوثائق المهمة، ونوادرِ المخطوطات والكتب، وبيعتمد المتحف على التبادل العلمي للمخطوطات مع المتاحف والمراكز العالمية.

ومتحف المخطوطات بيهتم بمجال ترميم المخطوطات، وكمان بيوفر مخطوطات مصورة نادرة من كل أنحاء العالم لخدمة الباحثين.

متحف الآثار

بيتضمن قطع أثرية من العصور الفرعونية واليونانية والرومانية والقبطية والإسلامية، وكمان فيه تحف بتعكس ثقافة الإسكندرية والمرحلة الهلينستية.

المتحف بيحتوى على 1133 قطعة معروضة، أبرزها قطع فنية اكتشفت أثناء أعمال الحفر في موقع المكتبة من سنة ١٩٩٣ – ١٩٩٥، وآثار وجدت في قاع البحر المتوسط بالقرب من الميناء الشرقي وفي منطقة أبو قير، وبيهدف لتعريف الزوار بالفترات المختلفة من تاريخ مصر.

المتحف تم تصميمه بأسلوب معاصر، وتم استخدام أحدث التقنيات في عرض مقتنياته، زي الإضاءة البصرية، وأنظمة الأمان والحريق، وبطاقات الشرح للزوار موجودة بـ3 لغات “عربي – إنجليزي – فرنسي”.

متحف تاريخ العلوم

المتحف بيوضح الجانب التاريخي للعلوم في مصر، وبيرصد 3 حقبات تاريخية مهمة، “مصر الفرعونية – الإسكندرية الهلينستية – الحضارة العربية الإسلامية في العصور الوسطى”، وبيلقى الضوء على العلماء اللي أثروا بأعمالهم في العلم والمعرفة، وهدفه إحياء الاكتشافات العلمية والإنجازات العظيمة للعلماء والمترجمين.

متحف تاريخ العلوم بيقدم مجموعة من الأنشطة لزوار المكتبة، وخاصة الطلاب، وكمان بينظموا جولات مميزة مع شرح كامل لمعرفة التاريخ.

 

تفاصيل التواصل مع مكتبة الإسكندرية

عنوان مكتبة الإسكندرية: الشاطبي، الإسكندرية، جمهورية مصر العربية.

تليفون: 4839999

لحجز الجولات الإرشادية والاستعلام عن زيارات المكتبة: 

تليفون: 4839999 داخلي: 1573 / 1574

بريد إلكتروني: Visits@bibalex.org