The Definitive Guide to Living in the Capital , Cairo , Egypt

الحيوانات الأليفة سواء القطط أو الكلاب، بمجرد وجودها في البيت، ومن أول يوم معانا وحوالينا، بنحس معاها بالحب والأُلفة والدفء والونس.. ودايمًا بنحاول نترجم حبنا ليهم ده على شكل اهتمام بكل التفاصيل اللي تخصهم، سواء بقى في شكلهم أو نظافتهم أو صحتهم.. وهما كمان بيبادلونا نفس الحب والاهتمام ده بس بطريقتهم اللي غالبًا بتبقى كوميدية وعفوية ولذيذة.. وبتكون سبب قوي لارتباطنا بيهم أكتر وأكتر.

وتفصيلة مهمة من ضمن تفاصيل كتير في حياة كل واحد عنده حيوان أليف هي “صحة” الحيوان ده، ودايمًا يبقى عندنا أسئلة كتير عن أفضل الطرق لوقايتهم ورعايتهم طبيًا بشكل سليم، وخصوصًا في ظل انتشار فيروس كورونا المستجد.. ومن النقطة دي تحديدًا بدأت شائعات كتير تطلع وأسئلة كتيرة عن هل الحيوانات الأليفة زي الكلاب والقطط ممكن يجيلها كورونا؟ وهل ممكن تعدينا؟.. وغيرها من الأسئلة.

النهارده حبينا في كايرو 360 نجاوب على كل أسئلتكم وتخوفاتكم ونطمنكم على حيوانتكم الأليفة وعلى نفسكم كمان.. وطبعًا زي ما اتعودنا إننا بنسأل دايمًا متخصصين في المجال اللي بنكلمكم فيه أو عنه علشان نوقف أي شائعات، ونعرف الصح.

سألنا دكتور “أحمد مجدي” طبيب بيطري في عيادة “بيت زون – Pet Zone Veterinary Clinic” في مصر الجديدة عن كل الأسئلة والمخاوف دي، وجاوبنا عليها بكل وضوح.. وكان أهم سؤال فيهم هل القطط والكلاب ممكن يجيلها “كورونا”؟ وهل ممكن تنقله للبني آدمين؟

الإجابة كانت بسيطة وعلمية، وهي “لأ”.. فيروس “كوفيد- 19” تحديدًا أو المعروف حاليًا بـ فيروس “كورونا المستجد” هو من فصيلة فيروسات “كورونا” لكنه بيصيب البني آدمين بس، وده اللي أكدت عليه منظمة الصحة العالمية أكتر من مرة في أكتر من تقرير.. وكمان المراكز الأمريكية لمكافحة الأمراض والوقاية منها (CDC) في أحدث تقاريرها.

السؤال التاني اللي جاوب عليه د.أحمد كان عن تمشية الكلاب في الشارع، أو اللعب مع القطط في البيت، هل ممكن يعرضنا للإصابة بـ “كوفيد – 19″؟ أو ممكن يعرضهم هم لأي خطر؟ خصوصًا إن في كلاب مدربة على عمل الحمام في الشارع.

الإجابة كانت.. ممكن.. لكن الاحتمالات ضعيفة بحسب تقارير “جمعية الطب البيطري الأمريكية”.. والحكاية ببساطة إن شعر وجلد الكلب أو القطة زيه زي الجلد اللي على إيدك أو وشك عبارة عن سطح ممكن يتنقله الفيروس ويستقر عليه بمجرد لمسه، لكن الجميل في الموضوع إن فرصة انتقال الفيروس من على حيوانك الأليف لإيدك أقل بكتير جدًا من فرصة انتقاله عن طريق سطح صلب أو أملس، وده لإن المسامات الموجودة في جلد وفرو وشعر الحيوانات الأليفة عندها القدرة على امتصاص الفيروس واحتجازه.. وبالتالي فرصة إنه يتنقل عن طريق اللعب أو اللمس ضعيفة، لكن ده مش معناه إننا مانخودش احتياطتنا.

هنا بقى سؤال مهم جدًا.. إزاي أقدر أحمي أو أعقم كلبي أو قططتي؟.. على حسب كلام د.أحمد فاحنا ممكن نعقم حيوانتنا الأليفة بطريقتين.. الأولى إننا نستخدم الصابون أو سائل الاستحمام الخاص بيهم لما نيجي ننظفهم.. ودي بتكون وسيلة كافية جدًا للقضاء على الفيروس.. أما الطريقة الثانية، ولزيادة التأكيد فهي استخدام بخاخات “الكحول” العادية بتاعتنا.. لكن نخلي بالنا إن الجو لازم يكون دافي أثناء رش الكحول، لإنه بيخفض درجة حرارة أجسام الكلاب والقطط.. فبالتالي رشتين أو ثلاثة كفاية، ويكونوا من على مسافة بعيدة شوية.

في نهاية كلامنا مع د.أحمد إدانا شوية نصائح مهمة، منها مثلًا:

1- نستخدم ألعاب مختلفة في اللعب مع الكلاب والقطط داخل البيت، علشان مايحسوش بالملل والاكتئاب، ونعوضهم عن فترة النزول والتمشية اليومية..ولو مضطرين نمشي كلابنا في الشارع، يبقى ضروري تلبس أي حاجة في رجليها علشان لو داست على حاجة ملوثة.. ولو ده صعب، ممكن نمسح أقدام الحيوانات الأليفة في دخولها وخروجها من البيت، وممكن نستخدم في العملية دي منظف مخالب، أو مناديل مخصصة لده، هتلاقوها بتتباع في محلات مستلزمات الحيوانات الأليفة.

2- الكلاب مش بتحتاج كمامات لحماية نفسها من فيروس كورونا المستجد، وبلاش تحت أي ظرف من الظروف تتخلى عن كلبك أو قططتك لمجرد مخاوف مش صحيحة ومش علمية.

3- مهم كمان نخلي بالنا من “الشمشمة” في الأرض.. علشان كده لازم نتخلص من الكمامات والجوانتيات المستخدمة بشكل سليم وصحيح علشان الكلاب ماتشمهاش أو تلعب فيها في الشارع فتنشر العدوى.

لو عندكم أي سؤال أو استفسار ممكن تسألوه في كومنت على صفحتنا “كايرو 360” أو من خلال الصفحة الرسمية للعيادة على الفيسبوك اللي هتلاقوها هنا.