The Definitive Guide to Living in the Capital , Cairo , Egypt

الفسيخ والبيض مرتبطين ارتباط قوي بشم النسيم، والمصريين من زمان بياكلوهم دايمًا في المناسبة اللي مصر كلها بتحتفل بيها، ولكن في ظل انتشار فيروس “كورونا” اللي حتى الآن ملوش علاج غير الوقاية، فالفسيخ كده ضرره كبير لأنه بيضعف المناعة جدًا.

الدكتور هاني الناظر، الرئيس السابق للمركز القومي للبحوث، قال في مداخلة هاتفية مع قناة “الحياة”، إن أكل الفسيخ بيسبب كتير من المشاكل الصحية زي النزلات المعوية، الأرتكاريا الحادة، التهابات الأغشية المخاطية، وكمان الفسيخ بيضعف المناعة بدرجة كبيرة، علشان كده في السطور الجاية هنقول لكم على 3 أكلات بديلة للفسيخ ومافيهاش ضرر على صحتكم.

السردين المملح

وده نسبة الأملاح فيه أقل من الفسيخ، وطعمه أحلى، وطريقة صنعه صحية عن الفسيخ، وسهل كمان يتعمل في البيت، ومعروف عن السردين أنه فيه فيتامينات ومعادن كتير، وكمان بروتين ودهون مشبعة، ده غير الفسفور والبوتاسيوم اللي هما عناصر مهمة جدًا للجسم.

الأنشوجة

هو نوع من أنواع الأسماك المملحة، لكن نسبة الملوحة فيه آمنة، وأقل من الفسيخ وكمان الرنجة، ومش مضر لصغار السن، وكمان تقدروا تاكلوه مع المكرونة والأرز والطماطم، أو مع البطاطس المحمرة.

التونة

هي من الأسماك الآمنة تمامًا للأطفال قبل الكبار، وتقدروا تعملوها بأي طريقة تعجبكم سواء بالطماطم والبصل والفلفل الأخضر، أو تعملوها مع مكرونة وفلفل ملون وذرة.

فريق كايرو 360 بيتمنى لكم السلامة يا أهل القاهرة.