The Definitive Guide to Living in the Capital , Cairo , Egypt

مشاريع الهاند ميد الفنية، كتيرة جدًا في القاهرة، فيه منها منتجات من الجلود والخشب والبلاستيك والحلي، لكن مشروع Touch of art Gallery  قرر يتميز في الهاند ميد ويحول كل ما لونه باهت أو خالي من الإبداع إلى حاجة مبهجة وبتدي طاقة إيجابية، وخلال السطور الجاية هنقولكم على كل التفاصيل اللي محتاجين تعرفوها عن المشروع ده وشغله.

الفكرة بدأت لما سلمى أشرف، خريجة كلية تجارة إنجليزي جامعة حلوان، قررت تحول كل حاجة لونها باهت وقديمة لحاجة مميزة بألوان تدي طاقة إيجابية في المكان، ومن هنا قررت تحويل أدوات المطبخ المصري لقطع فنية مش مجرد أدوات وخلاص، ومن هنا بقت تشوف المستقبل مبهج بالألوان، واتجهت لمهنة بتحبها.

وبدأت سلمى تشتغل على الصواني الخشب الهاند ميد، ودكة العمدة والقلل الفخار، والمنتجات النوبية وغيرها، ودي كانت البداية اللي من خلالها اتجهت سلمى لتطوير شغلها وبقت متخصصة في تحويل الطقم الصيني الأبيض العادي لطقم فني ألوانه مبهجة وتغير منا فكرة وشكل الطقم المعروف عند الناس.

بتعتمد سلمى في شغلها على الخشب للصواني، والصيني لفناجين القهوة والشاي والسيرفيس، وجزوع الشجر اللي بترسم عليها والفخار السوداني في القلل والطواجن، وكمان صفحة Touch of art Gallery، مشهورة بطقم قهوة مكون من سبرتايه نحاس، وكنكة استانلس، وبراد صاج، وصينية استانلس وسكرية.

أما أسعار المنتجات اللي بتقدمها Touch of art Gallery، فبتبدأ من 50 جنيه للقلل والطواجن الفخار وجزوع الشجر، و55 جنيه للصيني، و100 جنيه للمنتجات الخشب والصواني والكوسترات، وبيتم التوصيل حتى باب البيت بخدمة توصيل تبدأ من 20 جنيه.

تقدروا تتعرفوا أكتر عن المنتجات أو تطلبوها من خلال صفحة الفيسبوك من هنا.