The Definitive Guide to Living in the Capital , Cairo , Egypt

عشاق الحضارة المصرية على موعد مع أهم حدث مصري وعالمي يخص مصر، وهو افتتاح المتحف المصري الكبير.. المشروع العظيم اللي هيغير خريطة السياحة في بلدنا.. في السطور الجاية هنتعرف على أحدث التطورات وموعد الافتتاح من خلال 5 تصريحات حديثة للواء عاطف مفتاح، المشرف العام على مشروع المتحف المصري الكبير والمنطقة المحيطة بيه.

1 – بسبب ظروف جائحة كورونا اللي بيمر بيها العالم، تم إسناد مسئولية تنظيم حفل افتتاح المتحف لشركة محلية، بعد ما كان المفترض تقوم بالمهمة دي شركة عالمية، وحاليًا إدارة المتحف بتعقد جلسات عمل مع الشركة المسئولة عن تنظيم حفل الافتتاح؛ لتحديد سيناريو الحفل اللي هيبهر العالم، ويليق بعظمة مصر، ويؤكد قدرتها على البناء والتنظيم.

2 – الموعد النهائي لافتتاح المتحف مش هيكون مرتبط بمصر بس، لكن بظروف الجائحة والحالة الصحية في العالم كله؛ علشان يتم اختيار التوقيت المناسب للجميع.

3 – هيكون فيه شكل عالمي مبهر للخدمات بالمتحف، واللي بيقدمها تحالف (حسن علام) الفائز بإدارة الخدمات بالمتحف الكبير، وهو تحالف مصري إماراتي أمريكي، لكن اليد العليا في الإدارة هتكون للشريك المصري.

4 – عملية نقل مركب خوفو من منطقة الأهرامات للمتحف المصري الكبير، بتعتبر أكتر عملية معقدة حصلت في المتحف بسبب حساسية الأثر ده المصنوع بأكمله من الأخشاب والحبال، لكن نجح فريق عمل هندسي وأثري مصري عنده خبرة كبيرة في وضع مركب خوفو الأولي في صندوق مؤمن تمهيدًا لنقلها خلال شهر يونيه الجاي، لمتحف خاص بيها داخل المتحف المصري الكبير هي ومركب خوفو الثانية اللي بيتم ترميمها وتجميعها حاليًا في مقرها الجديد بالمتحف الكبير في مشروع الترميم اللي بتشرف عليه الجايكا اليابانية وهيستمر لحد سنة 2025م.

5 – المتحف جاهز حاليًا لاستقبال مركب خوفو، اللي سرعة ودقة عملية نقلها أنقذها من الانهيار والخطر، وهيتم عرض المركب في متحفها الجديد (المتحف الكبير) بسيناريو عرض مبهر ومختلف؛ باعتبارها قيمة أثرية مهمة تستحق مكانها الجديد.