The Definitive Guide to Living in the Capital , Cairo , Egypt

المتاحف العظيمة علامة من علامات القاهرة، ومن بين عدد كبير من متاحف العاصمة، فيه مجموعة متاحف أهلية، يعني مش حكومية، بتعود ملكيتها لأشخاص من عشاق الفن والإبداع. ومتحف الخزّاف نبيل درويش، الموجود أمام ترعة المريوطية وعلى طريق شبرامنت، بيعتبر واحد من أهم متاحف القاهرة اللي بتوثق لتراث مصري عظيم، وهو الخزف. لكن فيه مخاوف من هدم محتمل للمتحف ده، ضمن أعمال تطوير المنطقة، لكن المخاوف دي وصفتها محافظة الجيزة بإنها غير حقيقية، مؤكدة إن المتحف مش هيتم هدمه.

وقالت رجاء راشد، أرملة الفنان الراحل نبيل درويش اللي المتحف بيحمل اسمه، إنها مستلمتش أي إنذار رسمى بالإخلاء، لكنها عبرت عن خوفها من هدم المتحف أو ضياع تراث زوجها ومتحفه اللي تم تأسيسه بالجهود الذاتية، وده بسبب إن فيه 4 فنيين رفعوا قياساته بالكامل من حوالي أسبوعين، ورفضوا يعرفوها إيه السبب.

وقالت “راشد” لصحيفة المصري اليوم إن المتحف ده هو كل ميراث الفنان نبيل درويش، وإنهم بنوه بنفسهم علشان يضم أعماله الفنية الخزفية، ومقتنياته ومكتبته وأدواته الخاصة.

ومن جانبه، نفى اللواء علاء بدران، المتحدث باسم محافظة الجيزة، صدور أى قرار رسمى بإزالة المتحف أو جزء منه أو أى مبنى قريب منه في طريق سقارة السياحي.

ودول 3 معلومات عن المتحف:

1 – حصل نبيل درويش على الدكتوراه من كلية الفنون التطبيقية في الخزف سنة 1981، ومثّل مصر فى معرض فينيسيا الدولي للخزف 1971، وفي بينالي باريس في نفس السنة، وتم اختياره مستشار دولي في الاحتفال العالمي بفن الخزف سنة 2000.

2 – المتحف الخاص بالفنان نبيل درويش أقيم على مستوى عالمي بالنسبة للبناء والتجهيز للعرض وبيعتبر فريد من نوعه في العالم كله، وهو مبني على مساحة 150 متر ومحاط بحديقة مساحتها 700 متر.

3 – بيحتوي المتحف على 800 تحفة خزفية، بتشمل أساليب ومدارس مبتكرة مالهاش أي نظير في أي متحف في العالم منها: تماثيل العرائس، شباك القلة، الزخرفة البارزة على العرائس والتماثيل، وغيرها.

 

الصورة الرئيسية حاصلة على رخصة الاستخدام على أنسبلاش بواسطة “توم كرو”.