The Definitive Guide to Living in the Capital , Cairo , Egypt

صور المواليد والأطفال في أيامهم الأولى دائمًا بتكون مميزة علشان البراءة بتاعتهم وشكلهم الملائكي وجمالهم، وعلشان أول سنة من عمر أطفالنا هي الأجمل والأمتع، مهم نوثقها سواء بصور أو فيديوهات شخصية، والأمر بيكون أجمل لو التوثيق ده تم بشكل إبداعي ومحترف، وهي دي مهمة إيمان أحمد، المصورة المصرية اللي عشقت براءة الأطفال والمواليد، وقررت إن ده يكون تخصصها الرئيسي في عالم التصوير.

تعالوا نتعرف أكتر على تجربة إيمان مع توثيق أجمل فترة في حياة كل طفل، وهي أيامه الأولى في الدنيا.

إيمان أحمد مصورة صحفية في الأصل، وهي زوجة وأم لطفل، بدأ عشقها لمجال تصوير الأطفال بعد ما اشتغلت كمصورة مناسبات لأصحابها ولمعارفها سواء كانت خطوبة أو عيد ميلاد أو فرح أو فوتوسيشن شخصي، وفي وسط إبداعها الناس بدأت تلاحظ إن شغلها في تصوير الأطفال مميز جدًا ومختلف عن باقي شغلها. في الفترة دي اكتشفت إيمان إن حبها لتصوير الأطفال أقرب لشغف حقيقي، وبيلمس حاجة جميلة في روحها.

في 2016 بدأت إيمان تفكر في تصوير الأطفال المواليد بديكورات خاصة جدًا، مش مجرد تصوير بملابسهم العادية، ومع بداية شغلها كان فيه رهبة وخوف من التعامل مع الأطفال علشان تغيير الملابس وتظبيط الوضعيات وغيرها، وكان حضور طفلها يونس للدنيا عامل مهم أنها قدرت تتغلب على الخوف ده في التعامل مع الأطفال وكمان بقى عندها خبرة. ومن هنا بدأت تنطلق بشكل أكبر في تخصصها الجديد واتعلمت من مصورين بره مصر إزاي تتعامل مع المولود وإزاي تظبط وضعياتهم اللي تخلي الصورة تطلع بأفضل جودة تسيب ذكرى مميزة للأسرة وللطفل وليها شخصيًا.

أول سيشن بديكورات بشكل محترف عملته كان لصديقة ليها، وكان ببلاش، لأنه كان الأهم عندها يبقى عندها ماتيريال تقدر تسوق لفكرتها بيها، ومعظم الديكورات اللي بتستخدمها هي بتعملها بنفسها هاند ميد لإن دي هوايتها في الأساس، وكل شهر هي بتعمل ديكور واتنين جداد علشان تقدر تعمل حاجة مختلفة طول الوقت ومميزة وتواكب العصر.

ديكورات إيمان بطل في كل صورها، ومن صورها المميزة تصوير الأطفال بأشكال “سنواوايت – عباد الشمس – الملك” وحاجات تانية كتير.

وتقدروا تعرفوا أكتر عن تجارب إيمان أحمد مع تصوير المواليد والأطفال من خلال صفحة الفيسبوك من هنا.