“السلطان المؤيد شيخ”.. مسجد تاريخي في القاهرة كان في الأصل سجن!
السلطان المؤيد شيخ المسجد المؤيدي عنوان السلطان المؤيد شيخ مساجد تاريخية في القاهرة معلومات عن المسجد المؤيدي
Mohamed Talaat
كل حجر في مساجد القاهرة القديمة هو شهادة فنية عن فترة مهمة من تاريخ مصر، وده اللي هتحسه وأنت بتزور مسجد “السلطان المؤيد شيخ” أو “المسجد المؤيدي”، واللي بيعتبر واحد من المساجد الأثرية المهمة في القاهرة، وبيوصف بأنه فخر مساجد عصر المماليك الجراكسة.. لكن رغم أهمية المسجد إلا أنه اتعرض للسرقة أكثر من مرة.
مسجد “السلطان المؤيد شيخ” بدأ بناؤه سنة 1415م بأمر السلطان المؤيد أبي النصر سيف الدين شيخ بن عبد الله المحمودي الظاهري أحد حكام الدولة المملوكية خلال عصر المماليك الجراكسة. توفي المؤيد شيخ سنة 1421م وكانت وقتها قبة المسجد لسة تحت الإنشاء، وانتهى العمل بها في رمضان 1421م.
في المسجد ضريحين تحت القبة، واحد للسلطان المؤيد شيخ، والتاني لأبنائه الصارمي إبراهيم والمظفر أحمد وأبي الفتح موسى.
المسجد موجود في منطقة السكرية بمنطقة الدرب الأحمر التابعة لحي وسط القاهرة، وكان موقع المسجد في الماضي سجن بيعرف باسم “خزانة شمائل” سُجن فيه المؤيد شيخ مدة من الزمن لأسباب اختلف حولها المؤرخين، فنذر إلى الله إنه لو نجا من محنته وخرج من السجن بالسلامة هيبني مكانه مسجد، وده اللي حصل فعلًا!
للمسجد أربع حدود، بيطل حده الجنوبي الشرقي على شارع المعز لدين الله وبه الواجهة الرئيسية والمدخل، وبيطل حده الشمالي الشرقي على شارع الأشرقية، وحده الشمالي الغربي فيه الميضأة ومساكن الطلبة، وحده الجنوبي الغربي بيطل على شارع تحت الربع، أما الزاوية الجنوبية للمسجد فهي متداخلة مع البرج الغربي لباب زويلة.
وبيجاور المسجد مساجد أثرية مهمة زي مسجد الصالح طلائع، وزاوية الناصر فرج بن برقوق.
سرقة تحف أثرية من المسجد
تعرض باب مسجد المؤيد شيخ اللي بيعتبر تحفة فنية وبيعود أصله إلى مسجد السلطان حسن للسرقة أكتر من مرة، وكان في كل مرة بيتم سرقة جزء من الباب الأثري ده، زي الأجزاء النحاسية البارزة في حشوات الأبواب، والشريط السفلي للباب بالكامل وسرقات أكتر!
مسجد على عملاتنا المصرية
بسبب الأهمية التاريخية للمسجد، تم تزيين وجه العملة الورقية المصرية فئة 100 جنيه برسم لمنارتي المسجد فوق باب زويلة في إصدارات قديمة كانت بتطبع خلال الفترة من 1 مارس 1921 إلى 3 أبريل 1945، وكان الوجه التاني للعملة دي عليه صورة لمركب شراعي في نهر النيل.
مقترح
معالم وسياحة
معبد العدالة على النيل: صور من جوه المحكمة الدستورية وحكاية مهندسها اللي كان نفسه يبقى مخرج!
أحمد مصطفى ميتو الطراز الفرعونى +8
مطاعم
