The Definitive Guide to Living in the Capital , Cairo , Egypt

الصورة الرئيسية: Michael Starkie

في قلب القاهرة التاريخية، وبالتحديد عند أطراف منطقة القلعة، الحكومة المصرية بدأت شغل كبير لتحويل ميدان السيدة عائشة من مجرد ميدان مزحوم بالسيارات والباعة، لممشى سياحي عالمي اسمه “ساحة السلطان”، بيربط أهم المعالم الأثرية حوالين المنطقة في تجربة متكاملة تتمشى فيها وتتفسّح وتشوف التاريخ بعينك.

وده مش مجرد مشروع، مركز معلومات مجلس الوزراء نشر فيديو بيعرض خطوات التطوير، اللي بدأت بالفعل بإزالة الإشغالات والكوبري القديم المتهالك، واللي كان طول الوقت عامل عازل ومشوه للمنظر العام.

المشروع مش بس لتجميل المنطقة، لكن كمان بيحافظ على هويتها، وده ظهر لما اكتشفوا أجزاء من سور القاهرة القديمة أثناء الشغل، وهيتم ترميمه ودمجه جوه الممشى. وكمان هيضيفوا مسطحات خضرا كبيرة علشان تدي روح للمكان.

الممشى هيضم ميدان السيدة عائشة، مسجد السلطان حسن، مسجد الرفاعي، ومنطقة القلعة، وهيكون مساحة مفتوحة للناس تقدر تتمشى فيها وسط التاريخ والحضارة، وسط خدمات ترفيهية وتسويق بصري جذاب يليق بزوار من مصر ومن العالم كله.

وبحسب تصريحاته لصحيفة الشرق الأوسط، قال د. عبد الرحيم ريحان، خبير الآثار وعضو لجنة التاريخ والآثار بالمجلس الأعلى للثقافة، إن إزالة كوبري السيدة عائشة كانت خطوة مهمة مش بس علشان شكله، لكن كمان لأنه كان بيشهد حوادث كتير. وأضاف إن المنطقة كلها داخلة ضمن حدود القاهرة التاريخية، اللي معترف بيها عالميًا من منظمة اليونسكو، واللي بتضم آثار من العصر الفاطمي لحد المملوكي.

ريحان نوّه إن المشروع بيكمل سلسلة تطويرات حصلت في السنين الأخيرة، زي تطوير شارع المعز، وإضاءة قباب الأسرة العلوية، وفتح مناطق زي المدابغ القديمة علشان تبقى مناطق نزهة لكل الناس.

والجدير بالذكر إن القاهرة الإسلامية فيها أكتر من 500 مبنى أثري مسجل، وكل منطقة فيها بتحكي حكاية، والمشروع ده جزء من خطة أكبر لتطوير المنطقة بشكل متكامل بدل الشغل العشوائي اللي كان بيحصل زمان.

لكن كمان حذّر ريحان من إن المشروع ده لازم يتم بحذر، وما يتمش هدم أي مقابر تراثية، حتى لو مش مسجلة رسميًا، لأن كل حتة في القاهرة القديمة ليها قيمة تاريخية مش لازم تتنسي.

وأخيرًا..

لو عدّيت من عند القلعة قريب، خليك متوقع تشوف ملامح جديدة، ومكان كان دايمًا متهم بالعشوائية، دلوقتي بيتحوّل لساحة فخمة، بتجمع تاريخ وسياحة وخضرة في قلب القاهرة.. واسمها: ساحة السلطان.