The Definitive Guide to Living in the Capital , Cairo , Egypt

الصورة الرئيسية: Nikolay Tchaouchev

الصورة الداخلية: Janosch Diggelmann

حديقة الحيوان بالجيزة مش بس مكان ترفيهي.. دي حكاية بتجمع بين التاريخ، والجمال، والطبيعة. من ساعة ما اتفتحت سنة 1891 وهي رمز الترفيه لأجيال كاملة، وفي 2025 راجعة من تاني بشكل جديد هيخليها واحدة من أهم وأجمل حدائق الحيوان في العالم!

من يوليو 2023، الحديقة قفلت أبوابها وبدأت رحلة تطوير ضخمة، عشان تستقبل زوارها من جديد في سبتمبر 2025، برؤية حديثة بتجمع بين المتعة والمعرفة، والترفيه والحفاظ على البيئة. مشروع التطوير بيتم تحت إشراف خبراء عالميين، وبمعايير دولية في رعاية الحيوانات، وكل ده مع الحفاظ على التراث والتاريخ اللي يميز المكان ده.

مش بس حديقة حيوانات.. دي تجربة كاملة للعيلة كلها!

اللي جاي في حديقة الحيوان الجديدة مش مجرد فرجة على الحيوانات، لأ دي تجربة متكاملة لكل الأعمار: أنواع جديدة ونادرة من الحيوانات لأول مرة في مصر، عروض حية مع أسود البحر والفيلة والطيور، قبة زجاجية لحيوانات زي الميركات والليمور، أنشطة تفاعلية للأطفال زي إطعام الحيوانات وجولات مع مربّي الحيوانات، سوق للهدايا اليدوية، ومجموعة مطاعم وكافيهات في وسط الطبيعة، وفندق Safari Glamping بيجمع بين الرفاهية وجمال الحياة البرية، ده غير تطوير الممرات والمباني التاريخية زي كوبري إيفل، القاعة اليابانية، جزيرة الشاي.

كل تفصيلة في الحديقة اتعملت بحب وعلم، من أول الأشجار اللي عمرها فوق 150 سنة، لحد إعادة تصميم بيوت الحيوانات بشكل يحافظ على راحتهم وصحتهم.

ربط جديد بين حديقة الحيوان وحديقة الأورمان.. وجمال طبيعي بمساحة 112 فدان!

لأول مرة، هيتم ربط حديقة الحيوان بحديقة الأورمان من خلال نفق حديث، عشان يبقوا مع بعض أكبر مساحة خضراء مفتوحة في مدينة، فيها أكتر من 3 آلاف شجرة تاريخية و186 نوع من الحيوانات والطيور والزواحف.

حديقة الأورمان كمان بتشهد تطوير علمي مميز، بخزان مياه حديث، ومشاتل جديدة، وبحيرة لنبات اللوتس النادر، وكل شجرة فيها ليها كود خاص بتاريخها وحالتها.

مصر بتقدم تجربة عالمية.. باب جديد للسياحة البيئية

التجربة الجديدة لحديقة الحيوان مش بس بتستهدف الزوار المحليين، دي كمان خطوة كبيرة لوضع مصر على خريطة السياحة البيئية والترفيهية عالميًا. وده ظهر في اختيار الحديقة لاستضافة مؤتمر الاتحاد الأفريقي لحدائق الحيوان لأول مرة، واللي بيعكس قد إيه المكان ده بقى على مستوى عالمي فعليًا.

محمد كامل، رئيس شركة حدائق المتخصصة فى إدارة وتشغيل الحدائق والمنشآت الترفيهية والمسؤولة عن تطوير وإدارة وتشغيل حديقتى الأورمان والحيوان بالجيزة قالها بوضوح لفريق كايرو360: “اللي بنعمله هنا مش مجرد تطوير.. دي نقلة نوعية في صناعة الترفيه بمصر، بنقدم تجربة فيها ترفيه، وتعليم، وبيئة، وكل ده وسط تراث تاريخي نادر”.

وأخيرًا..

حديقة الحيوان الجديدة مش هتكون مجرد خروجة عادية زي زمان.. دي تجربة هتعيشها بحواسك كلها، وهتخرج منها بذكريات وصور وابتسامة كبيرة. لو بتحب الطبيعة، المغامرة، أو عاوز تفرّح ولادك بيوم مايتنسيش، استعد من دلوقتي.. سبتمبر 2025 قرب!