The Definitive Guide to Living in the Capital , Cairo , Egypt

الصورة الرئيسية: Eugenio Mazzone

في خطوة بتسلّط الضوء على الرواية العربية في شكلها الحديث، أعلنت صحيفة The National بالتعاون مع مركز أبوظبي للغة العربية عن قائمة مميزة لأهم 50 رواية عربية صدرت من بداية القرن الـ21 لحد دلوقتي، وده بحسب تقرير حديث نشرته مدونة مكتبة وهبان.

القائمة اتنشرت في تقرير موسّع على موقع الصحيفة في مايو الجاري، تحت عنوان: “50most important Arabic novels of the 21st century“.

واختيارات الروايات شارك فيها أكتر من 50 ناقد وكاتب وناشر ومنظم مهرجانات وعضو لجان تحكيم من العالم العربي، وده بيخليها واحدة من القوائم المهمة اللي بتعكس تحولات الأدب العربي المعاصر.

الصحيفة وضحت إن الرواية العربية في القرن الجديد اتغيرت في كل حاجة: البناء، المواضيع، وحتى الشكل. بدل ما تفضل محصورة في قضايا الهوية والسياسة بس، بقى فيه تنوع كبير في الأسلوب والمكان والتجربة. الروايات بقت بتتنقل بين مخيمات اللاجئين في رام الله، لأقسام الطب النفسي في بغداد، لأزقّة مكة، وبتفتح ملفات الصدمات والتغيرات الاجتماعية والنفسية والسياسية اللي عاشها العرب.

ورغم إن مصر ولبنان وسوريا وفلسطين لسه ليهم ثقل كبير في المشهد الروائي، لكن فيه أصوات قوية طلعت من دول زي السعودية، السودان، اليمن، الجزائر، والمغرب، وقدمت روايات بتعبّر عن تجارب محلية وإنسانية عميقة.

الجميل كمان إن الترتيب في التقرير ماكانش على أساس الأفضلية، لكن اتعمل حسب الترتيب الأبجدي للحروف الإنجليزية لدول جامعة الدول العربية.

ومن الروايات المصرية اللي ظهرت في القائمة:

عمارة يعقوبيان – علاء الأسواني

واحة الغروب – بهاء طاهر

عزازيل – يوسف زيدان

بعد القهوة – عبد الرشيد محمودي

الفيل الأزرق – أحمد مراد

الحلواني – ريم بسيوني

والقائمة شملت كمان أعمال مهمة زي:

ساق البامبو – سعود السنعوسي (الكويت)

فرانكشتاين في بغداد – أحمد سعداوي (العراق)

بريد الليل – هدى بركات (لبنان)

شوق الدرويش – حمور زيادة (السودان)

الطلياني – شكري المبخوت (تونس)

طوق الحمام – رجاء عالم (السعودية)

وعلى قد ما القائمة دي مش ممكن تعتبر “الأهم على الإطلاق”، لكنها بالتأكيد واحدة من أهم المحاولات لرصد تأثير الرواية العربية في الـ 25 سنة اللي فاتوا.

قائمة ثرية ومفتوحة للنقاش.. وإحنا بنرشحها لأي حد مهتم يكتشف أو يعيد اكتشاف الرواية العربية الحديثة.