The Definitive Guide to Living in the Capital , Cairo , Egypt

لقراءة المقال بالإنجليزية اضغط هنا

على النيل مباشرةً في المعادي، Tenaya Maadi بيقدملك خروجة مميزة وأكل يفتح النفس. المكان ده، اللي لسه داخل ساحة المطاعم الراقية في القاهرة، بيجمع بين الأجواء الهادية، الراحة، وقائمة طعام بتتنقل بين الكلاسيكيات المصرية والأطباق العالمية الشهية. سواء كنت من سكان المعادي وبتدور على مكان جديد لقعدة ليلية، أو سائح حابب تهرب من دوشة القاهرة في مكان شيك وهادي، Tenaya هو مكانك!

أجواء فخمة بطابع كلاسيكي

أول ما تخش Tenaya، هتلاقي قدامك منظر بانورامي خرافي للنيل وقعدة أوت دور واسعة ومفتوحة – مناسبة للغدا على رواقة أو قعدة ساعة المغربية مع أصحابك. بس المفاجأة الحقيقية جوه! الديكور بيمزج بين الفخامة والراحة، تحس كأنك قاعد في مطعم كلاسيكي واخد شوية لمسات فاخرة وأضاءة دافية. مكان شيك من غير تكلف، كأنه خروجة أصحابك المعتادة اتشيكت شوية!

مقبلات بتفتح النفس

بدأنا بأطباق المقبلات العالمية والمصرية، وجربنا الجمبري بالزبدة والليمون والكزبرة (790 جنيه). الجمبري كان طازة ومستوي بمزاج، وطعمه كريمي وناعم بلمسة توم، بعيد عن الطعم الحامض المعتاد. لو بتحب الأكل الزبدي بالتوم، الطبق ده هيبقى صاحبك المفضل!

على الطريقة المصرية: شركسيه الفراخ

من الأكلات المصرية، جربنا شركسيه الفراخ (680 جنيه) اللي بتتقدم مع صوص عين الجمل الكريمي. الصوص ده ناعم وتقيل شوية، شبه طبيخ مريح. الفراخ طرية والأرز مفلفل وكله على بعضه يديك طعم بيتوتي راقي. مناسب لو بتحب الأكلات اللي طعمها هادي ومش معمولة ببهارات كتير.

جنة لعشاق اللحمة

ماقدرناش نمشي من غير ما نجرب حاجة من الركن العالمي، فاخترنا ستيك فريت (1200 جنيه): ريباي مع بطاطس فريش وصوص كافيه دو باريس اللي طعمه توم وليمون بيدي للطبق كله نكهة تحفة.

نايل ڤيو، مزيكا حلوة، وقائمة أكل ممتعة

Tenaya عرف يحقق المعادلة الصعبة: أكل حلو، مزيكا خيالية، وقعدة تخليك عايز تفضل وقت أطول. المكان ده مثالي لو عاوز تهرب من الزحمة وتعيش شوية هدوء مع منظر النيل. Tenaya مش بس مطعم فخم وخلاص، ده مكان هتحب ترجعلُه لو نفسك تدلع معدتك وتقعد قعدة حلوة من غير ما تتعب في الاختيار.