The Definitive Guide to Living in the Capital , Cairo , Egypt

الصورة الرئيسية: Mikael Stenberg

هل فكرت في يوم إنك تكفل طفل وتمنحه حياة مليانة حب واهتمام؟ الكفالة مش قرار سهل، وخطواتها مش بسيطة، بس في الآخر بتخلق حياة جديدة. هي رحلة، شبه الولادة الطبيعية، فيها تعب وانتظار، بس نهايتها حضن ممكن يغيّر حياة طفل.. وحياتك أنت كمان.

لو عندك مساحة في قلبك، وفي بيتك، لطفل محتاج أمان.. يمكن الرحلة دي تبقى بداية حياة مختلفة ليك وليه.

في الدليل ده، فريق كايرو360 هيعرفك إزاي تبدأ المشوار، وهنشرحلك كل خطوة بتفاصيلها، وهناخدك معانا في رحلة إنسانية مع أسر قرروا يغيروا حياة طفل، فحياتهم اتغيرت هما كمان.

مايا مرسي.. رحلة اختيار أسرة لطفل

في فبراير اللي فات، ترأست الدكتورة مايا مرسي، وزيرة التضامن الاجتماعي، اجتماع اللجنة العليا للأسر البديلة، وقالت إنها بتحرص تشارك بنفسها في مقابلات الأسر اللي بتتقدم للكفالة، عشان إيمانها الكبير بأهمية الخطوة دي، وللتأكد إنها بتتم بشكل جاد ومهني.

الوزيرة شاركت في مقابلات مع أسر متقدّمة لكفالة أطفال، وسألتهم عن أسباب رغبتهم في الكفالة، وسمعت منهم، وشافت الضمانات اللي بيقدموها علشان يوفروا للأطفال حياة كريمة وآمنة.

بتقول مايا مرسي إن النظام ده – اللي بدأته الوزارة سنة 1959 – بيعتمد على دمج الأطفال المحرومين من الرعاية الأسرية، خصوصًا “كريمي النسب”، في أسر بتتختار بعناية ووفق معايير وشروط، تضمن صلاحية الأسرة، ونواياها السليمة، من غير أي استغلال أو مصالح شخصية.

بتضيف مايا مرسي إن الوزارة كمان بتهتم تشوف هل الأسرة عندها وعي وفهم لمعنى الكفالة، وهل عندهم استعداد يتعاملوا مع أسئلة الطفل عن هويته، وده بيتقيم من خلال مقابلات واستشارات نفسية.

بتشرح مايا مرسي: نظام الأسر البديلة هدفه الأساسي إنه يوفّر رعاية شاملة للأطفال، جوا بيوت تشبه بيوت أي طفل طبيعي، وسط أهل يلبّوا احتياجاتهم النفسية والتعليمية والاجتماعية. اللجنة العليا كمان بتراجع كل الطلبات والتظلمات، وقراراتها دايمًا مبنية على الشفافية والحياد.

وزيرة التضامن قالت إن النظام شهد تطوّر كبير الفترة اللي فاتت، ووصل عدد الأطفال اللي اتكفلوا في أسر بديلة لحد يناير 2025 لـ12,323 طفل، وعدد الأسر الكافلة بقى 12,094 أسرة على مستوى الجمهورية.

الوزارة بتوفّر للأسر الكافلة تدريبات متخصصة تساعدهم يربّوا الأطفال بطريقة صحية وسليمة، وسهّلت كمان تقديم الطلبات أونلاين، وكمان فعلت خط ساخن للاستفسارات (16439). وكمان مديريات التضامن بتتابع الأطفال المكفولين، وبتتأكد إن الأسر بتوفّر كل سبل الرعاية والحماية اللي تضمن مصلحة الطفل.

شروط كفالة طفل في مصر

لو قررت تكفل طفل، فيه شوية شروط لازم تتوفّر علشان العملية تتم بشكل قانوني وإنساني سليم.

أول شرط: لازم الزوجين يكونوا مصريين. بس اللجنة العليا للأسر البديلة تقدر توافق في حالات استثنائية على أسرة أحد الزوجين فيها مصري.

من الشروط الأساسية كمان إن الأسرة تكون مكوّنة من زوجين ناضجين اجتماعيًا وأخلاقيًا، وده بيتأكد من خلال بحث اجتماعي بيتعمل عن طريق الإدارة الاجتماعية والجمعية أو المؤسسة المسؤولة. لازم كمان يكون سن الزوجين ما بين 21 لـ60 سنة.

وفي حالات معينة، اللجنة ممكن تعفي من شرط السن لو البحث الاجتماعي أثبت صلاحيتهم. كمان الأرامل والمطلقات، أو الستات اللي مش متجوزين وسنهم فوق 30 سنة، ممكن يقدروا يكفلوا طفل، لو اللجنة شايفة إنهم مناسبين ومستحقين.

الأسرة لازم تكون قادرة ماديًا واجتماعيًا ونفسيًا وصحيًا على رعاية الطفل، ولازم تكون ساكنة في مكان فيه مدارس ومستشفيات ودور عبادة. والسكن لازم تتوفر فيه الشروط الصحية الأساسية.

كمان، دخل الأسرة لازم يكون كافي لتغطية احتياجاتها واحتياجات الطفل، والأسرة تتعهد إنها توفّر للطفل نفس اللي بتوفره لباقي أفراد البيت. ولازم كمان يكون فيه تعاون تام بينها وبين ممثلي وزارة التضامن الاجتماعي في متابعة الطفل بشكل مهني وسري.

من ضمن الشروط كمان إن الأسرة تلتزم بالحفاظ على نسب الطفل، ولازم الزوجين يكونوا حاصلين على شهادة الثانوية العامة على الأقل. وفي بعض الحالات، اللجنة ممكن تعفي من الشرط ده بناء على نتائج البحث الاجتماعي.

وأخيرًا، الأسرة اللي ناوية تكفل، لازم تحضر دورة تدريبية بتنظّمها الوزارة، وده علشان تضمن إنهم مؤهلين يقدموا رعاية حقيقية وسليمة للطفل.

من أول خطوة لحد أول حضن.. رحلة كفالة طفل

لو نفسك تحتضن طفل وتكون سبب في تغيير حياته، الرحلة بتبدأ بخطوة بسيطة جدًا.

أول خطوة: تقديم الطلب

كل اللي عليك إنك تدخل على الموقع الرسمي لوزارة التضامن الاجتماعي وتقدّم طلب كفالة، وبعد ما الطلب يتسجل، الوزارة بتحوّله للمديرية التابعة لمنطقتك أو للجمعية/المؤسسة الأهلية المختصة.

زيارة البيت والبحث الاجتماعي

بعد كده، أخصائية الأسرة والطفولة من الإدارة الاجتماعية بتتواصل معاك وبتزورك في البيت، وده علشان تعمل بحث اجتماعي وتتأكد إنك مستوفي كل الشروط اللي اتكلمنا عنها قبل كده.

هي كمان بتحضّر مذكرة بالمستندات المطلوبة، وبتكتب تقرير عن الحالة، وبتعرضه على اللجنة المحلية للرعاية البديلة، اللي بيرأسها مدير مديرية التضامن في محافظتك.

الموافقة واستلام الطفل

لو اللجنة وافقت، بيتسلم الطفل للأسرة من مركز من مراكز الأمومة والطفولة التابعة لوزارة الصحة، وبيتعمل عقد رعاية رسمي بين الأسرة البديلة وإدارة الأسرة والطفولة، والعقد ده لازم يوقّع عليه ضامنين اتنين.

طب والاسم؟ ممكن يتغير؟

آه ممكن، ودي من الحاجات اللي كتير من الناس بتسأل عنها.. لما الأسرة بتكفل طفل، بيكون ليه اسم رباعي موجود في شهادة ميلاده، والقانون في مصر بيسمح للأسرة الكافلة إنها تختار اسم جديد للطفل، وده بيتم بعد ما الكفالة تستقر ويكون فيه موافقة رسمية على تغيير الاسم.

الأسرة بتختار الاسم الأول بحرية تامة، يعني تقدر تسميه على اسم حد بتحبه أو اسم له معنى عندها. وكمان ممكن تغيير اسم الأب أو العائلة، لكن بدون تغيير اسم الجد. بحيث مايكونش فيه تطابق مع أسماء أسر موجودة فعلًا، وكمان يحافظ على خصوصية الطفل ومكانته وسط المجتمع.

الإجراءات بتتم من خلال مكتب السجل المدني، بعد موافقة وزارة التضامن، وبيبقى فيه تنسيق علشان استخراج شهادة ميلاد جديدة بالاسم الجديد، وده بيحصل بعد استلام عقد الكفالة، خلال شهر ونصف مثلًا.

9 شهور من التعب والحب

“أمين” قرر هو وزوجته يخوضوا التجربة، بيقول: “الإجراءات خدت حوالي 9 شهور.. مشاوير وأوراق ومقابلات، بس كانت رحلة تستاهل”. التسعة شهور عدّوا ببطء، كل يوم فيهم كان اختبار حقيقي لصبرك وإصرارك.. فيه تعب وانتظار، لكن في الآخر بتستقبل طفل يغيّر حياتك”.

أكتر حاجة لمست قلبه كانت الورشة التدريبية اللي حضرها مع زوجته، مدتها 4 أيام، وعلّمتهم حاجات كتير عن نفسية الطفل، وازاي يقولوله إنه مكفول بطريقة صح وفي الوقت الصح.

بيقول “أمين”: “الكفالة مش بس مسؤولية.. هي رسالة حب، بتسيب أثر في طفل، وفيك. لو حاسس إنك مستعد، ماتترددش.. يمكن تبقى البداية دي هي أعظم قرار في حياتك”.

منة شومان.. أم كافلة وقدوة ملهمة

منة شومان، واحدة من الأمهات اللي اختارت الكفالة، وبقت دلوقتي مصدر إلهام وسند لناس كتير بتحاول تاخد نفس الخطوة. بتحكي إنها كانت بتحلم بالكفالة من أكتر من 8 سنين، لكن القانون وقتها ماكنش بيسمح لغير المتزوجات بالكفالة. لكن لما القانون تغير مؤخرًا اعتبرت الأمر “رسالة من ربنا”.

بدأت تدور وتسأل وتقرأ، وكل ما تقرّب أكتر، تحس قد إيه الأطفال دول محتاجين بيت وأسرة. بتقول:

“الطفل محتاج يسمع كلمة ماما ويتحضن وهو نايم.. خصوصًا في أول 3 سنين، لأنهم اللي بيشكلوا شخصيته. حتى لو دور الرعاية كويسة، بس الأم حضنها مختلف”.

كإنك حامل.. بس من نوع تاني

منة بتشرح: “الإجراءات بتاخد وقت، وده طبيعي.. زي الحامل اللي بتمر بـ9 شهور تأهيل نفسي وجسدي. الكفالة كمان محتاجة تجهيز”.

منة استلمت طفلها بعد 40 أسبوع بالظبط من بداية التقديم، وبتقول: “كنت مستعدة.. عارفة أنا رايحة على إيه، ومسؤولة عن مين. والدولة بتعمل كده علشان تحمي الطفل.. لازم تتأكد إن الأسرة مش هترجع في كلامها”.

الورشة التدريبية.. نقطة تحول

مدة الورشة 4 أيام، وحضورها إجباري، وفيها جزء ديني، وتربوي، وقانوني، وبتجاوب على كل الأسئلة. منة بتقول إنها كانت “احترافية جدًا”، ومنظمات المجتمع المدني اللي نفذتها “فاهمة هي بتعمل إيه”.

ومن الحكايات اللي أثرت فيها: “الاستعلام الأمني اتأخر شوية، ووقتها كنت متضايقة، عرفت بعد كدة إن الطفل اللي هكفله ماكنش لسة اتولد، وبعد ما الإجراءات خلصت، حسيت إن ده قدر.. لو الاستعلام ما اتأخرش، كنت هكفل طفل تاني، مش هو”.

الموضوع مش وردي دايمًا.. فيه تحديات

منة بتتكلم بصراحة: “ابني كان عنده 4 شهور لما جه، وأنا كنت 37 سنة.. يعني عشت 37 سنة من غير طفل، وفجأة بقى عندي واحد. ده تغيير كبير، ومحتاج استعداد نفسي”.

وبتحكي كمان عن صعوبة إن بعض المدارس لسه مش متقبلة فكرة الكفالة، وممكن ترفض الطفل.

“تربية الأطفال مش بس حب وحضن.. فيها ليالي من غير نوم، وقرارات صعبة.. بس فيها لحظات حب وسعادة تستاهل”.

نصيحة منة: متكونش لوحدك

بتنصح أي حد بيفكر في الكفالة إنه يدخل جروبات زي “الاحتضان في مصر” و”يلا كفالة” و”كفالة”، علشان يعرف معلومات أكتر، ويسمع تجارب ناس سبقوه، وياخد دعم نفسي في الطريق اللي مش سهل، لكنه فعلًا يستاهل.

“نور لي حياتي”.. حكاية “آية” مع الكفالة

“آية”، أم مصرية، قررت مع زوجها ياخدوا خطوة الكفالة، بتحكي بحب كبير:

“أنا كنت فخورة ببلدي وبالإجراءات المحترمة اللي فيها. في الغرب ممكن تقدم على تبنّي وتخلص في أيام، بس إحنا هنا بنمشي بخطوات أبطأ وأدق، علشان الطفل يوصل لأكتر بيت مناسب ليه”.

“آية” بتدي التجربة 9 من 10، وبتقول: “كنت فاكرة إنها هتبقى روتين حكومي ممل، لكن اتفاجئت إن كل خطوة كان ليها معنى.. من أول التحاليل، للزيارات الميدانية اللي بتتأكد إن البيت آمن ومستقر. الموضوع مش فقر أو غنى، لكن عن حياة كريمة وآمنة للطفل”.

وعلشان كده، “آية” بتحب تسميها “احتضان” مش “كفالة”: “الكلمة فيها دفء أكتر.. لأن فعلاً إحنا بنحضن الطفل ببيتنا وبقلبنا وبكل مشاعرنا”.

رسالة من القلب لأي حد بيفكر في الكفالة

“آية” بتنوّه عن حاجة مهمة جدًا: “فيه أسر بتاخد طفل ولما يواجهوا تحديات بيرجعوه، وده بيدمّر الطفل نفسيًا. علشان كده الورشة علمتنا إمتى وإزاي نقول للطفل إنه مكفول، من غير ما نهز ثقته فينا”.

وبتوضح إن: “كل خطوات الكفالة مجانية، ماعدا تحاليل بسيطة زي تحليل المخدرات والتحاليل الطبية، ودي مش مبالغ كبيرة. أصل إحنا مش بنشتري طفل، إحنا بنفتحله بيت وقلب”.

الورشة التدريبية.. مش بس للكفالة

“آية” شايفة إن الورشة مفيدة لأي أب وأم، مش بس للأسر الكافلة، لأنها بتتكلم عن التربية بشكل شامل، وبتساعد الأهالي يستعدوا نفسيًا بجد.

“اللي بيحضر الورشة ويتفاعل، بيطلع منها فاهم وواعي، وعارف هو داخل على إيه. المهم إن يكون جاد، ويحضر للآخر علشان ياخد الشهادة”.

9 شهور.. زي الحمل بالضبط

“آية” بتقول: “أنا عديت بكل المشاعر طول الرحلة.. خوف، توتر، فرحة، قلق.. بس في الآخر فهمت إن زي ما الحمل بياخد 9 شهور علشان الأم تتجهز، الكفالة كمان بتاخد وقتها، وده في مصلحة الطفل”.

وبتكمل: “لو الطفل طلع كويس، فأنت ربيته كويس.. ولو لأ، فأنت اللي قصرت معاه. لازم يعرف من هو صغير إنه مكفول، مش يسمعها فجأة في خناقة!”.

بتنهي “آية” كلامها بابتسامة: “ابني نور لي حياتي.. ويا رب إحنا كمان نكون نور لحياته. المكان الطبيعي لأي طفل هو بيت وأسرة، مش دار أيتام”.

ختام الرحلة.. بداية حياة

الكفالة مش مجرد إجراءات وورق، دي رحلة إنسانية حقيقية، بتبدأ بقرار وبتكمل بحب.. رحلة بتغير حياة طفل، وبتخلق من الأسرة نفسها حكاية جديدة.

كل طفل يستاهل بيت وأمان.. وكل قلب بيحلم بالأبوة أو الأمومة، ممكن يلاقي الفرصة دي في الكفالة.

أسئلة وإجابات مهمة

هل الطفل هيعرف إنه مكفول؟
الخبراء بيأكدوا إن من الأفضل نكون صادقين مع الطفل، لكن بطريقة تناسب سنه وفهمه، علشان يبني هويته بشكل صحي.

هل ممكن أسحب كفالتي بعد فترة؟
نظريًا ممكن، لكن ده بيأذي الطفل نفسيًا جدًا، علشان كده لازم الأسرة تكون واثقة إنها قادرة تكمل.

هل ينفع أسافر بالطفل؟
آه، بعد الحصول على موافقات معينة، ممكن الطفل يسافر مع الأسرة الكافلة، خصوصًا بعد استخراج الأوراق الرسمية اللازمة.

طيب.. إيه الورق اللي هحتاجه في رحلة الكفالة؟

صورة بطاقة الرقم القومي للزوج والزوجة، وصورة من عقد الجواز (أو قسيمة الطلاق، أو شهادة وفاة الزوج حسب الحالة)، وفيش وتشبيه حديث، وصورة المؤهل الدراسي، وشهادة طبية حديثة بتثبت خلوك من فيروس C أو B، وأوراق تثبت البيانات المكتوبة في الطلب، زي: شهادات ميلاد الأولاد (لو فيه)، مفردات المرتب أو المعاش أو دخل تاني، بيان بالممتلكات، إيصال كهربا أو صورة عقد إيجار/تمليك.

أقدر ألاقي مصادر تساعدني في رحلة الكفالة؟

طبعًا! فيه مصادر كتير ممكن تساعدك وتدعمك بمعلومات مهمة جدًا خلال رحلتك.

من أبرزهم مؤسسة Face، واللي بيقدموا دعم حقيقي ومحتوى توعوي مفيد لأي حد مهتم بالكفالة. كمان فيه جروبات على فيسبوك زي “كفالة”، و”يلا كفالة”، و”الاحتضان في مصر”، تقدر من خلالها تسأل، تتفاعل، وتسمع تجارب ناس سبقوك في الطريق ده.

ولو بتحب تقرأ، بنرشّح لك كتب مهمة عن الكفالة، زي سلسلة القصص اللي كتبتها سمية حازم رأفت، واللي منها قصة مؤثرة جدًا بعنوان “أجمل هدية – قصة عن التبني”، وهي متوفرة في مكتبات القاهرة.

عندك أسئلة أكثر؟ اتصل بـ16439

*تم تغيير بعض أسماء الأسر الكافلة بناءً على طلبهم.