The Definitive Guide to Living in the Capital , Cairo , Egypt

الحلو بنقوله يا حلو.. وطعم الحلويات دايمًا بيغيّر المود! وعلشان كده، من أكتر الحاجات اللي بنحب نقيّمها في كايرو 360 هي الحلويات والقهوة، لأن لما الاتنين بيجتمعوا، بيعلّوا عندنا كل هرمونات الحب والفرح.

المرة دي كانت تجربتنا في كافيه “Pancakes” فرع الشيخ زايد – وصلة دهشور، وهنحكي لكم في السطور الجاية رأينا بكل صراحة.

المكان ديكوراته كلاسيكية، بيغلب عليه اللون الأبيض، وهادي جدًا، مش زحمة، ودي حاجة بتفرق. المنيو محدود شوية، بس الموظفين هناك متعاونين جدًا، بيشرحوا وبيقترحوا بهدوء وبطريقتهم اللطيفة. كمان فيه أوت دور لطيف على الطريق، بيكون أهدى بالليل، والإن دور مناسب للناس اللي بتحب تقعد في تكييف بعيد عن دوشة الشارع.

جربنا الميني بان كيك، وطلبنا نصه شوكولاتة ونصه بيستاشيو، وسعره 190 جنيه. نقدر نقول إنه كان “مقبول”، بس لو أنتوا من عشّاق الميني بان كيك قوي، ممكن مايبقاش مبهر. ومع ذلك، نؤكد إن جودة المكونات عندهم ممتازة جدًا، وكل قطعة لها طعم واضح وأصيل.

أما في المشروبات، جربنا الآيس سبانيش لاتيه بـ85 جنيه، وكان من التجارب اللي حبيناها فعلًا. طعمه مضبوط، وسعره مناسب، وممكن نقول إنه “قيمة مقابل سعر”.

وكمان جربنا الكابتشينو الكلاسيك، واللي ممكن نوصفه ببساطة: يا حلو الحلو! إحنا من عشاق الكابتشينو اللي فيه لسعة الإسبريسو، ومش كل الأماكن بتعرف تظبطه، لكن هنا كان فعلاً مميز.

بالمناسبة، “Pancakes” ليهم فروع تانية في أكتر من مكان، لكن تجربتنا كانت في الشيخ زايد.

لو زرتم المكان قبل كده أو قررتوا  تروحوه، احكولنا عن أكتر حاجة عجبتكم فيه!

تقدروا تعرفوا أكتر عنهم من خلال صفحة الفيسبوك من هنا.