The Definitive Guide to Living in the Capital , Cairo , Egypt

الصور: صفحة المتحف على فيسبوك

اللحظة اللي العالم كله مستنيها بقاله سنين خلاص قربت!

رئيس الوزراء الدكتور مصطفى مدبولي أعلن إن الرئيس عبد الفتاح السيسي وافق على تحديد يوم 1 نوفمبر 2025 كموعد رسمي لافتتاح المتحف المصري الكبير، أكبر متحف أثري في العالم مخصص لحضارة واحدة، واللي بيطل مباشرة على أهرامات الجيزة.

رئيس الوزراء وجه كل الوزارات والجهات المعنية تكمل الاستعدادات على أعلى مستوى، علشان يكون الافتتاح بالشكل اللي يليق باسم مصر وحضارتها العظيمة.

مايفوتكش كمان: اعرف أسعار تذاكر المتحف المصري الكبير 2025 والتخفيضات والفئات المعفاة

طيب إيه اللي مستنيك جوا المتحف المصري الكبير؟

المتحف المصري الكبير مش مجرد متحف، ده تجربة متكاملة بتجمع بين التاريخ، الفن، والتعليم، في مكان واحد. ودي أبرز الحاجات اللي هتشوفها هناك:

كنوز توت عنخ آمون: أول مرة يتم عرض كل مقتنيات الملك توت عنخ آمون في مكان واحد، من ساعة اكتشاف مقبرته، واللي عددها أكتر من 5000 قطعة!

مجموعة الملكة حتب حرس: قطع نادرة بتخص الملكة حتب حرس، والدة الملك خوفو، وبتكشف تفاصيل مذهلة عن الحياة الملكية في العصور القديمة.

مركب الملك خوفو: المتحف بيضم مركب الشمس الثاني للملك خوفو، بعد ما تم استخراجه من باطن الأرض، وتجهيزه للعرض لأول مرة.

قاعات العرض الرئيسية: هتلاقي فيها قطع أثرية بتمثل كل مراحل الحضارة المصرية، من العصر الحجري لحد العصر الروماني.

قاعات العرض المؤقتة: مساحة متجددة للمعارض المتغيرة، علشان دايمًا تلاقي جديد في زيارتك.

متحف الطفل: تجربة تفاعلية للأطفال، بتخليهم يتعلموا عن تاريخ أجدادهم بطريقة ممتعة وبسيطة.

مناطق تجارية وترفيهية: محلات، كافيهات، مطاعم، حدائق، وكل اللي محتاجه علشان تقضي يوم كامل هناك من غير ما تزهق.

قاعة الدرج العظيم: ممر ضخم بـ 87 قطعة أثرية، بيقودك لصعود مهيب بانورامي ناحيـة الأهرامات.

قاعة البهو العظيم: نقطة الانطلاق الأساسية، وفيها تمثال رمسيس الثاني مع 5 قطع ضخمة، هتحسسك بعظمة المكان من أول خطوة.