The Definitive Guide to Living in the Capital , Cairo , Egypt

الصورة الرئيسية مولدة بـGemini Ai

الأكل المصري بالنسبة لنا لا يعلى عليه ومافيش مطبخ في العالم يقدر ينافسه في طعامته وأصالته، ومن هنا قررنا أننا ننقلكم تجربة لمطعم مصري مختلف، والتجربة بتاعتنا المرة دي كانت في مطعم بهية النيل واللي قررنا نجربه علشان نقولكم رأينا فيه وهل يستاهل يكون ممثل حقيقي للأكل المصري الأصيل ولا لأ!

المكان موجود داخل عوامة على النيل، والديكور بسيط وبيعتمد على كراسي وترابيزات سمبل، وداخليًا المكان مكيف والفيو من الشباك أحسن، في حين أن الإضاءة والجو بالليل في الأوبن إريا بيكونوا أفضل لو بتحبوا النسيم اللطيف، والخدمة بتتم من شباب مصري عاديين ولكنهم مميزين بيكملوا الخدمة المصرية علشان تبقى كل حاجة بتتكلم مصري.

الحقيقة احنا كنا حابين نجرب أكتر من صنف في الأكل ولكن قررنا نطلب صينية علشان تكون متكاملة في الطلب بتاعها ونجرب أصناف أكتر، ولكن للأسف الصينية بينزل معاها جبنه قديمة ومورتا وعيش توست يادوب يكفوا فرد واحد، وطلبنا سلطة طحينة بسعر 30 جنيه، وسلطة خضراء بسعر 25 جنيه، وطعمهم زي أي طعم في مطعم مصري أصيل بنفتخر بيه، بس مكنش معاهم مياة سلطة كانت هتبقى التجربة متكاملة.

ندخل بقى على المهم وهو أننا طلبنا صينية زبدة بهية، ودي كانت بسعر 1100 جنيه وفيها 6 أصناف مفروشين على الصينية وفي النص كان فيه طاسة سخنة وعليها زبدة بتسيح وبيحطوا عليها الصنف السابع فردتين الحمام اللي كانت ع الصينية وده بيديها طعم حكاية، وخلينا نقول أن الحمام كان حلو ولكن ماكنش “well done” وكمان كان فيه الممبار كان حكاية وأفضل حاجة بتتبيلة حراقة بتكمل جمال الأكل، وفراخ شيش مميزة، وورق عنب مقبول ولكنه كان بارد وبالتالي مقدرناش نحكم عليه صح ونوصل الطعم الحقيقي، وسمبوسك لحمة عجبتنا، والكفتة اللي هتدوب وانتوا بتاكلوها، وكمان كرنب اللي للأسف ماكنش الأفضل في الصينية ومحتاجين له ريسبي جديد وتسوية أفضل.

التجربة بشكل عام كانت مرضية لينا ومميزة وصينية زبدة بهية تكفي لها 3 أفراد على الأقل ولكن يعيبها أن مفيهاش سلطات ولا المقبلات اللي نزلت معاها مرضية لأن مستحيل تكفي أكثر من فرد والصينية كبيرة وتكفي 3 أفراد على الأقل ولكن خلينا نقول “قيمة مقابل سعر” مقبولة، واحنا بنشجعكم تروحوا وتجربوا المكان والأكل بتاعهم وخدمتهم اللطيفة اللي بنشركهم عليها.

تقدروا تعرفوا أكتر عنهم من خلال صفحة الفيسبوك من هنا.