The Definitive Guide to Living in the Capital , Cairo , Egypt

الصور: صفحة وزارة النقل المصرية على فيسبوك

وزارة النقل أعلنت إن المرحلة الأولى من القطار الكهربائي السريع “السخنة – الإسكندرية – العلمين – مطروح” هتبدأ تشتغل رسميًا في يونيو 2026، بعد الانتهاء من كل أعمال التشطيبات النهائية وتركيب القضبان بالمحطات.

أما الخط التاني اللي بيربط مدينة السلام والعاشر من رمضان والعاصمة الإدارية الجديدة، فمقرر افتتاحه قبل كده في مارس 2026.

شبكة القطار الكهربائي السريع

المشروع بيضم 3 خطوط رئيسية بإجمالي أطوال حوالي 2000 كم، و60 محطة موزعة على الشبكة، مع وجود ورشتين رئيسيتين و6 نقاط صيانة.

الخط الأول للقطار الكهربائي السريع

الخط الأول طوله حوالي 660 كم، وبيضم 21 محطة، منهم 13 محطة للقطار السريع و8 محطات إقليمية. الخط ده هيكون حلقة وصل مهمة بين البحر الأحمر والبحر المتوسط بريًا.

حجم التشغيل المخطط

من المخطط إن الشبكة يشتغل عليها 41 قطار سريع و94 قطار إقليمي، بجانب 41 جرار للبضائع. وفرق العمل دلوقتي بتكمل تركيب القضبان والتشطيبات النهائية للمحطات.

أهمية المشروع

القطار الكهربائي السريع مش بس وسيلة نقل سريعة، لكنه كمان هيخدم مناطق عمرانية وصناعية جديدة زي 15 مايو، برج العرب، 6 أكتوبر، المنيا الجديدة، وأسيوط الجديدة، وكمان مناطق سياحية شهيرة زي الأقصر، أسوان، البحر الأحمر وأبوسمبل.

المشروع هيخدم كمان مشروعات زراعية قومية كبيرة زي مستقبل مصر، الدلتا الجديدة، غرب المنيا، توشكى وشرق العوينات، وده معناه إنه هيبقى محور لوجستي ضخم بيربط الإنتاج الصناعي والزراعي بالموانئ ومراكز التصدير.

غير كده، القطار الكهربائي السريع هيخلق آلاف فرص العمل المباشرة وغير المباشرة، وهيقلل من الانبعاثات الكربونية، وده هيحسن جودة النقل العام في مصر بشكل كبير.