The Definitive Guide to Living in the Capital , Cairo , Egypt

الصور: أحمد أمين على إنستجرام

الفنان أحمد أمين أعلن عن انطلاق جولته الجديدة في فن الستاند أب كوميدي بعنوان “مين.. أمين؟”، والسؤال ده مرتبط بيه من أول ظهور ليه على المسرح من حوالي 8 سنين، لما قدم مهرجان السينما العربية وقتها وقال للجمهور: “انتو ممكن تستغربوا ليه اختاروا أحمد أمين يقدم المهرجان.. بس فيه سؤال أهم: مين أمين أصلاً؟”، الجملة اللي ضحكت النجوم الحاضرين ساعتها، لأنه كان لسه بيعرف نفسه للجمهور.

الجولة هتبدأ يوم 8 أكتوبر الجاي من مدينة هيوستن في أمريكا، وبعدها دالاس (9 أكتوبر)، تمبا (11 أكتوبر)، نيويورك (12 أكتوبر)، واشنطن (14 أكتوبر)، لوس أنجلوس (25 أكتوبر) وأخيرًا سان ديجو (26 أكتوبر). وكمان هيزور كندا ما بين 16 و22 أكتوبر في 5 مدن مختلفة.

أمين أكد إن الجولة كلها هتكون باللغة العربية علشان يفضل قريب من جمهوره العربي، وقال إن “الضحك هو اللغة الأصدق للتواصل”. ومن المخطط إن الجولة تُختتم بحفل كبير في القاهرة.

ومن الجانب الإنساني، أعلن أحمد أمين إن كل أرباح الجولة هيتبرع بيها لصالح معهد الأورام في مصر، علشان يثبت إن الفن مش بس للمتعة، لكن كمان لخدمة المجتمع.

العرض “مين.. أمين؟” مش مجرد ستاند أب كوميدي، لكنه أقرب لسيرة ذاتية كوميدية بلمسة فلسفية. أمين هيحكي عن مراحل حياته المختلفة: من طفولته وأحلامه، لشغله كموظف، وبعدها الزواج والإنجاب، لحد دخوله تجربة اليوتيوب، ووصوله للتمثيل والشهرة. بيقول أمين: “حتى مع كل ده، السؤال لسه حاضر: أنا مين؟ ساعات بحس إني كبرت فعلًا مع كل المسؤوليات، لكن جوايا لسه طفل صغير بيدور على نفسه”.

وكمان هيقدم مبادرة جديدة، يدي فرصة لمواهب كوميدية شابة من مصر والعالم العربي يشاركوا معاه بجُمل قصيرة في كل مدينة يزورها، علشان يفتح مساحة لاكتشاف أصوات جديدة في عالم الكوميديا.

الجولة دي مزيج بين الضحك والتأمل، وبتاخد الجمهور في رحلة مختلفة للإجابة على سؤال واحد: “مين.. أمين؟”.