The Definitive Guide to Living in the Capital , Cairo , Egypt

التاريخ لا يُباع ولا يُشترى، وكنوز حضارتنا القديمة هي اللي بتعرفنا بنفسنا وبتفكرنا بقيمة اللي ورثناه من أجدادنا، وخبر اختفاء أسورة ذهبية نادرة من عهد الملك أمنموب، من الأسرة الحادية والعشرين، من المتحف المصري بالتحرير كان صادم وحزين.

الأسورة دي كانت مصنوعة من الدهب الخالص، ومزينة بحبة لابيز لازورد كروية، وبتعتبر رمز ملكي بيلخص براعة المصريين القدماء في التصميم والدقة، اختفت من معمل الترميم بالمتحف في سبتمبر 2025 أثناء التحضير لمعرض “Treasures of the Pharaohs”  في روما.

أمل رغم الحزن

لكن رغم الحزن اللي سببته القصة، الجانب المضيء إن الحديث عن كنوزنا المصرية وقيمتها أصبح نقاش رئيسي في المجتمع، وده نتمنى يخلي المصريين يهتموا أكثر بزيارة المتاحف. ومهم نعرف إن فيه قطع شبيهة ليها لسه معروضة في المتحف نفسه، وتحديدًا في قاعة تانيس بالدور العلوي. القاعة دي بتضم مجموعة من أروع كنوز منطقة تانيس (صان الحجر بالشرقية)، واللي اشتهرت بإنها واحدة من أغنى المقابر الملكية المكتشفة، مليانة ذهب ومجوهرات من عصر الأسرة الحادية والعشرين.

المتحف المصري بالتحرير نفسه، اللي تأسس سنة 1902، بيضم أكتر من 120 ألف قطعة أثرية، من تماثيل مصرية قديمة ضخمة لغاية جواهر دقيقة الصنع. زيارة القاعة دي فرصة إنك تتعرف على تاريخ مش بس من خلال الكتب، لكن من خلال كنوز عاشت آلاف السنين وما زالت موجودة قدامنا.

إزاي تروح المتحف المصري بالتحرير؟

المتحف المصري موجود في قلب ميدان التحرير، يعني الوصول ليه سهل جدًا سواء بالمترو (محطة السادات على الخطين الأول والتاني) أو بالمواصلات العامة، وكمان بالعربية وفيه جراج التحرير تقدروا تركنوا فيه بسهولة.