أوديسي.. رحلة جوّه مغارة كنوز التراث المصري
Steam Bending أبواب تاريخية أبواب قديمة أثاث قديم أماكن شراء أبواب خشب قديمة أنتيكات أوديسي تحف تراث مصري تطريز السرما حرف يدوية مصرية ديكور أبواب معرض أنتيكات منتجات نحاس أنتيك
Mohamed Talaat
وأنت ماشي في شارع أبو الهول السياحي، ممكن يقابلك مبنى شكله عادي من بره، لكن أول ما تخطي بابه هتحس إنك دخلت مغارة من الزمن الجميل.
“أوديسي” مش مجرد معرض أنتيكات، لكنه رحلة جوه الحكايات اللي عاشتها البيوت المصرية زمان، بين أبواب خشب محفورة بإيدين الصنايعية القدام، وتحف برائحة النحاس والعاج والخشب المعتق.
المكان بيجمع بين الفن والتراث، بين الماضي اللي لسه عايش، والحِرفة اللي بتتجدد على إيد مصريين قرّروا يكونوا حُراس حقيقيين لسر الجمال المصري الأصيل.
المكان عبارة عن هنجر كبير بمساحة عرض مفتوحة، فيها بارتشنات مقسمة للأنتيكات والأثاث القديم، واللي نقدر نقول إن فيها ريحة زمان وأيامه الحلوة.
المعرض مكون من دورين، كل حاجة فيهم قديمة بحالتها وتفاصيلها، وممكن تتجدد على إيد عمال مصريين المهارة هي السمة الأولى في شغلهم.
هما مش مجرد صنايعية، لكن فنانين عارفين قيمة كل قطعة وروحها.
زيارتنا للمكان كانت كعملاء محتملين، وبدأنا الجولة بتصوير بعض المنتجات.
المكان بيعرض كل حاجة جوه كل بارتشن بشكل منفصل، وهتلاحظوا إن العنصر الأساسي في العرض هو الأبواب القديمة بتاعة أوائل القرن الـ19، ووسطها مجموعات مختلفة من الأنتيكات والتحف والأثاث.
وفي المنتصف، هتلاقوا مجموعة تحف متنوعة، سواء تماثيل أو قطع أثاث أو غيرها من الأنتيكات، معروضة بطريقة مميزة تخليك ما تملش، وتخليك تفكر في كل قطعة وتشوف وراها حكاية.
بعد جولتنا “الخفية”، حبينا نعرف أكتر عن تاريخ القطع.
قابلنا واحدة من المسؤولين في المكان، واتكلمنا معاها واكتشفنا إن كل حاجة هناك تم شراؤها من بلاد مختلفة وفي أزمنة مختلفة على مر السنين؛ سواء كانت أبواب أو تحف أو أنتيكات قديمة أو لوحات لفنانين مصريين.
وفيه حاجات بيتعاد تجديدها أو – زي ما قالولنا – “بيتم إحياؤها من جديد”.
كمان عندهم محاكاة لكسوة الكعبة بصناعة اسمها “السرمة”، وهي تطريز هاند ميد بفن وإبداع على قماش نفس خامة كسوة الكعبة.
وبيكتب عليها آيات قرآنية أو أبيات شعرية أو أقوال مأثورة.
وفيه منها الجاهز، وكمان ممكن تطلبوا “أوردر خاص” يتنفذ حسب ذوقكم.
أما الأبواب – سبب زيارتنا للمكان – فهي قديمة وتراثية فعلاً، لكن ممكن تعدلوا فيها اللون أو التفاصيل علشان تناسب ذوقكم.
الأبواب دي بتستخدم في الأساس كديكور، لكن ممكن كمان تبقى أبواب حقيقية للعقارات أو المشروعات التجارية.
عندهم كمان مجموعة متنوعة من الأنتريهات، والبوفيهات، والنيش، وغرف الجلوس والسفرة، وكلها قطع قديمة بحالتها الأصلية وبتتجدد حسب الطلب.
أما قسم النحاس، فده لمس قلبنا، لأن فيه حاجات فكرنا ببيوت أجدادنا زمان.
بصراحة، كان صعب نختار من كتر المعروضات المميزة.
ومن أكتر الحاجات اللي لفتت نظرنا مجموعة الأعمال الخشبية المنزلية زي الفواطة، والشماعة، وسرر الأطفال، والترابيزات، وكراسي السفرة المعمولة بطريقة حرق الخشب علشان تاخد الانحناءات المطلوبة.
الطريقة دي غالبًا بتتعمل بالبخار، وخلينا نقول إنهم مبدعين فيها فعلاً، وعاملين شغل عالي الجودة.
انبسطنا جدًا إننا شفنا منتجات بالشكل ده في مكان واحد، وكمان إنهم قادرين ينفذوا أي شغل خاص بفكرة Steam Bending أو “الثني بالبخار”.
في النهاية، احنا انبسطنا جدًا بزيارتنا المميزة، وبنشجعكم تزوروا المكان وتشوفوا بعينكم لو بتحبوا التحف، والأنتيكات، والأبواب القديمة العريقة، وكل ما له طابع تاريخي.
المكان كمان مناسب جدًا لهواة التصوير – العادي أو السينمائي – لأن “أوديسي” مش مجرد معرض، لكنه مساحة لإحياء التراث المصري الجميل.
إزاي توصل للمكان؟
العنوان: شارع أبو الهول السياحي – أمام مسجد العوادلي – المنصورية – الهرم.
رقم التليفون: 01220851568
تقدروا تعرفوا أكتر عنهم من خلال صفحة الفيسبوك من هنا.
